CEBU, Philippines - Nasikop sa kapolisan kagahapon ang usa ka tawo kinsa nasakpang nagtangkil og .38 kalibreng revolver ug duha ka linikit nga marijuana didto sa merkado publiko sa dakbayan sa Lapulapu.
Ang suspetsado nailhan nga si Alexander “Alex” Arenario, 26, ulitawo nga taga sitio Langob, barangay Poblacion, sa maong dakbayan.
Matud pa ni PO3 Ranilo Valiente ug PO2 Francisco Rustia sa Lapulapu City Police Station nga may gikalalis nga vendor ang suspetsado sulod sa merkado sa dakbayan.
Dihang nadiskitahan sa mga katawhan nga mibansiwag ang armas niini sa iyang hawak, misumbong sila sa kapolisan.
Dihang girikisa sa mga polis ang suspetsado, didto nasuta niini ang iyang armas nga walay lisensya busa gisakmit dayon kini uban sa duha ka linikit nga marijuana gikan sa iyang bulsa ug karon hayahay na kaayo kini sa prisohan sa Lapulapu nga nagpaabot sa sumbong isang-at batok kaniya. - BANAT NEWS