San Nicolas police station no. 1 sa nasud gikasurpresa

CEBU, Philippines - Nasurpresa si Konsehal Sylvan “Jack” Jakosalem sa pagpili sa San Nicolas Police Station sa dakbayan isip modelo nga police station sa nasud tungod kay wala magdahum ang konsehal nga dinhi sa Sugbu mapili ang hatagan sa maong pasidungog taliwa sa kadaghang police stations sa tibuok kapupud-an.

Nasayran nga kini maoy labing unang higayon nga dunay presinto sa kapulisan sa dakbayan nga nakakuha sa nahisgutang award.

Gipildi sa San Nicolas Police Station ang mga kaatbang niini nga mga police station sa dakbayan sa Davao ug Mindoro nga mi-qualify usab sa search.

Ang kataas sa crime solution efficiency gawas sa pagmentinar sa kahapsay ug kalinaw sa Area of Responsibility maoy pipila sa gibasihan pagpili sa modelong police station.

Gikatahong ang San Nicolas Police Station dunay 98 porsiyentong crime solution efficiency ug migamit sa tanang resources niini pagmentinar sa peace and order.

Matud pa ni Jakosalem nga ilang gikalipay ang naangkong pasidungog sa nahisgutang police station sa siyudad. Ang konsehal nga sakop sa Committee on Public Order and Safety sa City Council nanghinaut nga manakod ngadto sa ubang police station sa dakbayan ang gihimo sa San Nicolas.

“Hinaot unta nga mahimo ning example sa ubang police station sa siyudad ug sa whole Cebu City Police Office,” sumala ni Jakosalem.

Nasayran nga ang hepe sa San Nicolas Police Station nga si Sr. Insp. Noel Lomente mao mismo ang personal nga mikuha sa ilang award.

Kini atol sa ika-19 nga anibersaryo sa Philippine National Police (PNP) kagahapong adlawa didto sa kauluhan nga gitambungan ni Presidente Gloria Macapagal Arroyo.

Lakip sa nakadawat og pasidungog kagahapon mao ang 7th Regional Public Safety Management Battalion nga kanhi Regional Mobile Group 7, isip model regional maneuver unit. - Elly Bolonos (BANAT NEWS)