Pro-life rally himuon

CEBU, Philippines - Mopahigayon na usab og prayer rally ang Task Force for Life (TFL) karong hapon diha sa Cebu Metropolitan Cathedral sumala pa ni   Doctor Rene Josef Bullecer samtang motapos na ang sesyon sa kongreso sunod semana.

Matud ni Bullecer nga ang tumong sa ilang kalihukan mao ang pagpahinumdum sa mga magbabalaud sa hugot nilang pagsupak sa pipila ka mga balaodnon.

Partikular na niini ang kontrobersyal nga Reproductive Health Bill nga nagtugot sa paggamit og contraceptives sama sa condom, pills ug uban pa.

Gihulagway ni Bullecer ang nahisgutang proposed measure nga nasukwahi sa pagtulun-an sa Simbahan hinungdan nga kini hugot nilang gisupak.

Gipadayag sa chairman sa TFL nga ang nahabiling mga adlaw sa sesyon sa kongreso nahimong kulbahinam alang kanilang mga pro-life group.

Kini tungod kay posibleng ipalusot ang mga balaudnon nga hugtanon nilang gisupak nga naglakip na sa Gay Rights Bill ug uban pa.

“Kay matud pa ni congressman (Raul) del Mar dili ta mokompiyansa kay aning last three days sa session (Lunes, Martes, Miyerkules), any miracle can happen,” sumala ni Bullecer.

Ang prayer rally sa TFL magsugod sa alas 4 sa hapon hangtud na sa alas-6 sa sayong kagabhion sa atubangang bahin sa simbahan sa Cathedral.

Miingon si Bullecer nga ang laing tumong sa nahisgutang kalihukan mao ang pagpahigmata sa katawhan nga wala pa mahuman ang ilang tinguha.

“This is just to awaken sa panghuna-huna sa katawhan that the battle is not yet over kay crucial kaayo ning last three sessions sa kongreso,” dugang ni Bullecer.

Nagtuo si Bullecer nga ang Reproductive Health Bill ipamugos pagduso sa kongreso sa mga proponent niini tungod sa naghinapos na nga mga adlaw sa ilang sesyon. – BANAT NEWS