19-anyos gipusil sa ribal nga frat

CEBU, Philippines - Patay nang nadangat sa tambalanan ang usa ka 19-anyos nga batan-ong lalaki human kini gipusil sa laing grupo sa mga batan-ong gituohang may kalambigitan sa panagribal sa fraternity diha sa sitio Suba barangay Poblacion lungsod sa Liloan niadtong Lunes sa alas 4 sa kaadlawon.

Ang biktima mao si Richard Peronio, 19, apan dunay kapuyo ug molupyo sa maong lugar.

Matud pa ni SPO1 Recardo Enriquez sa Liloan police dihang nahinabi sa Banat News subay sa imbestigasyon naglakaw ang biktima paingon nga mopauli kauban ang mga barkada ug kapuyo apan tungod kay hubog nauwahi kini og lakaw ug diha-diha nahitabo ang pagpamusil.

Nakaangkon og duha ka samad pinusilan sa kalawasan ang biktima ug gidali pagdala sa Eversley Hospital sa siyudad sa Mandaue apan gideklarar sa mga doktor nga dead on arrival (DOA).

Matud pa ni SPO1 Enriquez ang kapuyo sa biktima nga si Mirasol Anoba, 18, mibutyag dihang gisukitsukit sa kapulisan mihulagway sa mamumuno nga gamayon ug nagtaptap sa iyang nawong. Si Anoba nagkanayon nga nagsuot og seninang kolor puwa ang mamumuno ug ang maong sinina nalabnot gikan sa maong lalaki dihang iyaha kining gilayog human pusila ang biktima apan napakyas siya pagtan-aw sa dagway niini, ang sinina atoa na karon sa kapolisan.

Kasungian sa panagribal sa fraternity ang gitutukang motibo sa krimen sa nagpadayong imbestigasyon sanglit ang biktima gikatahong sakop sa Crips gang. – BANAT NEWS