5 ka bulto 'shabu' sakmit

CEBU, Philippines - Dul-an usa ka milyon nga shabu ang nasakmit gikan sa duha ka suspetsadong drug dealers, usa kanila babaye sa gipahigayong joint buy-bust operation sa Criminal Investigation and Intelligence Branch sa Cebu City Police Office ug Investigation Detective and Management Branch sa siyudad sa Mandaue kagahapon sa hapon.

Unang nasikop mao si Abdul Pangcoga, 22, nga kasamtanagan nga nagpuyo sa San Jose Pension House sa dalan Rahman sa barangay Zapatera kinsa maoy nakaingon nga natultulan ug nadakpan usab si Mira Macapato nga taga barangay Mantuyong sa dakbayan sa Mandaue.

Ang duha pulos nangangkong mga taga Marawi City sa Lanao del Sur didto sa Mindanao.

Sumala pang Supt. Pablo Labra II, nakadawat sila og intelligence report nga dunay usa ka lalaking namaligya og illegal drugs diha sa maong pension house.

Tuod man usa ka buy-bust operation ang ilang gihimo ginamit ang usa ka poseur buyer nga miresulta sa pagkasikop kang Pangcoga ug pagkasakmit sa usa ka dakong bulto sa gidudahang shabu nga gibana-banang P400 mil ang kantidad.

Sa pakighinabi sa Banat News kang Labra kini nagkanayon nga human sa pagkasikop ug giimbestigar si Pangcoga kini mibutyag sa iyang source ug miila kang Macapato nga naa sa Mantuyong sa dakbayan sa Mandaue.

Si Pangcoga gikatahong sinaligan ni Macapato ug maoy nahimong yawe nga nahulma ang operasyon batok sa maong babaye.

Diha-diha dayun daling gipahibalo ni Labra si Sr. Supt. Noel Gillamac sa Mandaue City Police Office alang sa buy-bust operation batok kang Macapato alas-3 sa hapon kagahapon sa mga sakop sa MCPO ug sa CCPO.

Susama sa gihimo sa CIIB ginamit ang usa ka poseur buyer nasikop si Macapato ug nakuhaan og usa ka dakong pakete sa shabu ug dihang girekisa laing lima ka medium nga paketeng gituuhang shabu nga nagkantidad og P400 mil.

Sa pakighinabi sa mga tigbalita ni Cebu City Director Patrocinio Comendador nagkanayon kini nga kasagaran sa ilang nasikop naggikan gyud sa Mindanao.

Dugang pa ni Comendador nga nagduda sila nga dili lang konektado sa mga lokal nga pushers ang mga tawong naa sa Sugbo kondili anaa kini sa ubang kasikbit nga dakbayan.

Sa miaging tuig nakasikop usab sila og taga Marawi ug nakuhaan usab og dul-an usa ka milyong shabu.

Si Labra mitug-an nga ang supply karon sa ginadiling drugas sagad nagagikan na sa Mindanao. – BANAT NEWS