CEBU, Philippines - Mikabat sa P9.2 milyones ang danyos sa nahitabong sunog sa Borromeo Building nga naugdaw sa miaging gabii pasado alas-otso sa dalan P. Lopez ug eskina dalan Borromeo barangay Kalubihan.
Mga bombero wala pa makatino kun unsay nakaingon sa pagkasunog sa maong 3-storey building nga giokupar sa Ongsingko Enterprises, Game City Internet Café nga gipanag-iya ni Philip Sy ug ang Victoria Auto Supply nga gipanag-iya usab ni Ellen Escalona.
Ang maong sunog nga giisa ngadto sa 3rd alarm ug nakontrolar sulod sa usa ka oras ug 22 minutos.
Sa pakighinabi sa Banat News kang City Fire Marshal Esmael Codilla kini nagkanayon nga adunay gamay’ng damage ang University of San Jose Recoletos apan ‘minimal’ lang kini tungod usab sa fire wall sa maong unibersidad.
Mibutyag usab si Codilla nga usa sa iyang mga bombero nga si SFO4 Danilo Almendra ang naangol human kini nasamad sa kamot.
Samtang mitug-an usab si Codilla nga hangtod karon wala pa sila masayod kon unsa gyud ang hinungdan sa maong sunog kini tungod kay hangtod karun nagpadayon pa ang pagkuha sa mga arson investigators sa mga ebidensya ug clues diha sa fire scene. - Lesley Caminade (BANAT NEWS)