Polis sa Pardo Police Station gipetisyonan

CEBU, Philippines - Dul-an sa 100 ka mga residente sa barangay Pardo ning siyudad sa Sugbu ang miduso og petisyon ngadto sa Ombudsman ug sa National Bureau of Investigation nga naghangyo ipabalhin sa ubang dapit ang polis sa Pardo Police station nga giimbestigar karon ug gikasuhan tungod sa pagsuway pagpatay sa usa ka gipasanginlang tulisan.

 Ang nangulo sa pagduso sa maong petisyon mao si Madronio Sabellano, ang amahan sa giingong biktima sa pagpamusil nga si Reynaldo Sabellano, nga nagpuyo sa Pardo.

Ang gipetisyonan mao si SPO4 Sanrico Joli-joli kinsa maoy natumbok sa imbestigasyon sa Commission on Human Rights kon CHR-7 nga misulay sa pagpatay pinaagi sa pagpusil ni Reynaldo Sabellano niadtong Enero 11, 2009.

Ang 92 ka mga petitioner nagkanayon diha sa ilang petisyon nga angayang ipabalhin sa laing lugar gawas sa Sugbu si SPO4 Joli-joli tungod kay padayon silang gihulga niini pinaagi sa pagpakatap sa nakamotorsiklong armadong mga police assets ni Joli-joli ngadto sa ilang panimalay ug pagpahigayon og kalit nga operasyon.

Si Sabellano mipasangil nga siya ug ang iyang mga silingan wala gyud hunungi sa maong polis sa pagpang-harass tungod sa ilang pagpasaka og kaso ngadto sa CHR batok kang Joli-joli.

Gipasanginlan usab ni Sabellano ang maong polis nga maoy mi-planted og illegal drugs sa usa pa niya ka anak nga si Bernabe Sabellano nga giingong giplanteran og marijuana ni Joli-joli ug gipasakaan og kaso sa korte.

Nabilanggo sulod sa duha ug tunga ka tuig si Bernabe ug giabsuwelto sa maong kaso ni MTC branch 4 Judge Manuel Patalinghug tungod kay wala tambungi sa maong polis ang mga hearing bisan makapila gipatawag sa korte, apan una pa ma-release, namatay sa sakit sa kasingkasing si Bernabe.

Sumala pa ni Sabellano sa ilang petisyon nga sa higayon nga magkita sila ni Joli-joli kanunay sila niining hulgaon pinaagi sa pag-ingon nga hutdon sila niini og patay kay kuno sila “mga kaliwat og buang.”

Gisuwayan sa Banat News pagtawag sa ilang buhatan si SPO4 Sanrico Joli-joli aron kini kakuhaan og pamahayag kabahin sa petisyon ug mga alegasyon apan si PO1 Diosdado Pareja nga maoy nakatubag sa telepono miingon nga off duty na si Joli-joli.– BANAT NEWS