Nagdala'g kutsilyo sikop sa checkpoint

CEBU, Philippines - Nadakpan sa kapolisan ang usa ka tawo nga nagdala og kutsilyo sa usa ka checkpoint nga gipahigayon didto sa sitio Soong 1, barangay Mactan, dakbayan sa Lapulapu sa miaging buntag.

Ang nadakpan mao si Reymundo Tisoy Enerio, 24, ulitawo nga taga dalan D.M. Dimataga, sa barangay Poblacion sa nahisgotang dakbayan.

Si Inspector Gerald Soquib sa kapolisan sa nahisgotang dakbayan maoy nangulo sa checkpoint nga gipahiluna sa nahisgotang lugar dihang sa paghinol nila sa lawas sa suspetsado kinsa nagsakay og usa ka multicab nga pasaheroan, nahikapan nila ang gitangkil nga kutsilyo niini.

Diha-diha gisakmit dayon sa kapolisan ang maong hinagiban ug gisikop usab ang suspetsado.

Kasong concealing deadly weapon maoy gipasaka batok kaniya kinsa nagtingkagol na karon sa prisohan sa maong dakbayan. – BANAT NEWS