Noynoy nalipay sa museum nga gitukod pahinungod sa ginikanan

CEBU, Philippines - Gikalipay og maayo ni Liberal Party presidential aspirant Senador Benigno "Noynoy" Aquino III ang pagbukas sa People Power Museum sa Mactan Marina Mall sa barangay Pusok dakbayan sa Lapulapu sa milabay'ng hapon.

Matud pa ni Aquino nasurpresa siya sa gihimo ni Lapulapu City LP mayoralty candidate Efrain Pelaez sa pagmugna sa usa ka museum sa dakbayan sa Lapulapu nga nagpahinumdum sa mga kaagi sa iyang mga ginikanan ug sa ilang nahimo sa nasud.

 Subling gipanaad ni Noynoy ngadto sa mga suporter niini sa dakbayan sa Lapulapu nga dili siya mangawat ug mag-abusar sa iyang gahom kun hatagan siya og kahigayonan sa pagserbisyo isip pangulo sa nasud.

 Samtang si Lapulapu City Mayoralty Candidate Efrain Pelaez sa pakighinabi sa Banat News mipadayag nga ang maong People Power Museum sa dakbayan sa Lapulapu namugna alang sa mga katawhan ilabi na ang mga kabatan-onan.

Kini aron sila masayod sa mga paghitabo sa milabay'ng 1986 People Power diin   sila ni kanhi senador Benigno "Ninoy" Aquino ug kanhi presidente Corazon "Cory" Aquino kun giunsa nila pagbungkag ang kanhing diktadoryang rehimen ni presidente Ferdinand Marcos.

Ang pagbukas sa People Power Museum sa dakbayan sa Lapulapu gitambungan sa gatosan ka mga supporters   ni Sen. Noynoy Aquino ug Sen. Mar Roxas kinsa maoy kapares ni Noynoy isip vice presidential aspirant ingon man ni Lone District sa Lapulapu congressional aspirant Atty. Eugene Espidido. – BANAT NEWS