Igsuon ni Tongol namusil

CEBU, Philippines - Duha ka tawo ang naangol sa nagsunod nga pagpamusil niadtong milabay'ng gabii ug kagahapon sa kaadlawon dinhi sa dakbayan kansang suspek nga gitumbok mao ang igsuon ni anhing Joel ‘Tongol’ Nodalo.

Napusilan niadtong milabay'ng gabii si Ronald Calma, 24, residente sa Quezon Blvd. sa sitio Bato barangay Ermita ning dakbayan sa iya rang silingan nga giilang si Isidro ‘Botix’ Nodalo, Jr. nga padayon pang gipangita. Si Tongol nga pinangita kaniadto sa kapolisan tungod sa mga kaso napatay didto sa Bohol pila na ka tuig ang nakalabay.

Si Nodalo (Botix) nalambigit na sa ubang kaso sa pagpamusil sa dakbayan sulod sa nanglabay'ng katuigan apan kanunay'ng makaikyas.

Sumala pang SPO2 Geofrey Gutual sa Homicide Section sa pakighinabi sa Banat News, base sa imbestigasyon ni SPO4 Rey Cuyos, nanag-inom ang biktima ug mga higala daplin sa dalan dihang miabot si Nodalo ug dayong namusil, si Calma naigo sa tangkugo ug buko-buko ug gidala sa uyoan nga si Ricky Baricuatro ngadto sa Cebu City Medical Center. Duha ka oras ang milabay, laing lalaki na usab ang gipusil diha sa susamang dapit diin usa ka Edgardo Nodalo ang naangol human kini pusila sa mao gihapong suspek ug sa gihapon nakaeskapo.

Ang maong insidente natala sa blotter sa Carbon Police Station apan ang mga imbestigador sa maong buhatan ug sa Homicide Section naglisod pagkuha og impormasyon kabahin sa motibo sa pagpamusil.

Ang mga biktima sumala pang PO2 Michael Codaste sa pakighinabi sa Banat News pulos nagdumili sa paghatag og pamahayag kabahin sa pagpamusil. – BANAT NEWS