CEBU, Philippines - Gitagbo sa liboang Argaoanon ang patay’ng lawas ni Press Secretary Glesergio ‘Cerge’ Remonde pag-abot niini kagahapon sa udto sa lungsod sa Argao gikan sa Malacañang sa Sugbu.
Ang funeral entourage miagi pa sa panimalay sa mga Remonde diha sa dalan Lakandula sa barangay Lamacan ug gilahos ngadto sa Diosdado Macapagal Sports and Cultural Center alang sa public viewing.
Gikatakdang ilubong si Remonde diha sa Argao Municipal Cemetery ug mouban sa nagbangutang Sugbuanon sa paglubong sa kalihim si Presidente Gloria Macapagal Arroyo nga siyam ka tuig niining giserbisyuhan.
Samtang kagahapon sa hapon, sila si Gobernador Gwendolyn Garcia, Kongresista Pablo Garcia sa ikaduhang distrito sa lalawigan sa Sugbo ug uban pang mga opisyal sa lokal nga kagamhanan sa Sugbo, misil-ing usab sa katapusang higayon sa haya sa Press Secretary, ang giilang bayani sa mga Sugbuanon ilabi na sa taga Argao.
Kauban sa convoy nga mihatod sa haya ni Secretary Remonde gawas sa mga honor guards nga gilangkoban sa mga sundawo sa Central Command sa Armed Forces of the Philippines, mao ang mga sakop sa Cebu ug Manila media nga taga radio, television ug pamantalaan.
Ang Kapisanan ng mga Brodkaster ng Pilipinas Cebu Chapter maoy usa sa dakong pundok sa mga miuban sa biyahe paingon ngadto sa Argao.
Gikan sa pag-abot sa haya ni Press Secretary Remonde nagbaha ang katawhan gikan sa mga tiguwang, hamtong ug mga batan-on nga misulod ug guwa sa PDMSCC sa gipahigayong public viewing sa haya.
Sa pagka-alas 3:00 sa hapon gihimo ang mesa ug hangtod sa pagka-alas 7:00 sa gabii , dayon gisunod ang nechrological service.
Sa tibuok gabii gihimo ang pagbilar sa mga suod sa Press Secretary gikan sa mga paryente, higala, taga media , mga local nga opisyal sa kagamhanan, ug uban pa, agi’g pahinungod sa katapusang higayon ngadto sa gihaya nga opisyal.
Si Secretary Remonde namatay sa atake sa kasingkasing sa alas 11:51 sa buntag niadtong Martes, Enero 29, 2010 sa edad nga 51.
Sa pakighinabi sa mga tigbalita kang Argao Mayor Edsel Galeos, kini mipadayag sa kasubo apil na ang mga Argaoanon apan midayeg sa kalihim sa mga nabuhat niini ngadto kanila.
Matud pa niya nga daghang mga plano ang kalihim alang kanilang mga taga Argao sa dihang buhi pa kini nga naglangkob sa public market, hydro pump sa kabukiran aron dunay kakuhaan og tubig.
Naglaom karon ang mga taga Argao sa pag-abot sa pangulo nga pasaligan silang mapadayon gihapon ang mga proyektong gisugdan ug buot pang himuon ni Remonde diha sa Argao.Ang Diosdado Macapagal Sports and Cultural Center nga nagkantidad kini og P28 milyones ug ang mga eskolar nga gipatungha sa kalihim maoy mga kabilin niini sa Argao.
Samtang usa sa mga misugat sa kalihim mao ang iyang magbalantay sukad sa pagkabata nga si Felicima Mamites nga nahinabi sa Banat News, mibutyag nga buotang bata ang kalihim.
Sumala pa niini wala mag-usab ang kalihim sa pamatasan sukad pa kaniadto hangtud nga kini nahimong kalihim.
Si Virgilio Alburo, ang half-brother ni Remonde nagkanayon nga daw nahugno ang ilang kalibutan tungod sa pagpanaw sa ilang igsuon tungod kay usa kini sa mga haligi sa ilang pamilya.
Karung adlawa alas-9 sa buntag ilubong si Remonde nga gipaabot nga tambungan sa liboang mga Argaoanon.
Samtang si Arroyo mobisita una sa Cansaga bridge nga usa sa mga proyektong imprastraktura sa gobiyerno nga nagdugtong sa dakbayan sa Mandaue ug lungsod sa Consolacion. (ug Wen Celen ) (BANATNEWS)