CEBU, Philippines - Mipasalig ang usa sa mga congressional aspirants nga ibutang sa mapa sa mga malambuong distrito sa nasud ang ikaunom nga distrito pinaagi sa mga programang sa iyang tan-aw maoy mamahimong behikulo aron kini makab-ot.
Buot nga palambuon sa international economist ug karon mosulod sa politika nga si Rene ‘r.e.’ Espina pinaagi sa iyang “Pride Program” nga nagkahulugang Program for the Resurgence of Industrial, Development and Excellence.
Mga programang sa iyang tan-aw wala karon sa distrito maong wala niini matagad ang kakabus sa mga konstituwente sanglit nag-unang programa hinuon mao ang pagpanghatag lamang hinungdan nga nagsalig na hinuon ang kadaghanan imbes nga makat-on.
“The problem with this approach is that it is constrained by financial budgets and therefore far more limited in efficacy,” matud pa ni Espina.
Kini maoy hinungdan nga ang maong mga programa di makasugakod sa padayong pagdaghan sa mga kabus gumikan sa nagkadaghang nangawad-an og trabaho.
Ang programa ni Espina makig-alayon sa Kaigsuonan sa Kasanag Padulong sa Kalamboan(K3)nga operatiba kansang tahas mao ang pagtuon kun asang bahina sa katilingban ang kinahanglang atimanon.
Apan ang pagtabang di pinaagi sa pagpanghatag kundili ang pagtudlo kanila pinaagi sa mga libreng livelihood trainings nga may klarong nagpaabot nga trabaho sa nagkadaiyang economic zones dinhi.
Sumala pang Espina nga kun duna may mga programang gipatuman ang kasamtangang kongresista kinahanglang tun-an nila og balik ug susihon gyud kung si kinsa ang mga nakabenepisyo niini ug kun kini epektibo ba o wala partikular ang mga kabus.
Lakip sa gipanglantawang makabenepisyo niini mao ang kabataan, nangataktak sa trabaho, kababayen-an pinaagi sa paghatag kanila og tukmang trainings aron makatrabaho dili lang dinhi kundili lakip na sa abroad.
Matud pang Espina nga ang 'Ibalik ang Garbo sa Sixto Distrito’ nga iyang gitinguhang mahitabo mao unya’y magdala sa distrito ngadto sa kalampusan, pinaagi sa malambuong industriya (Mandaue), medical resort spa, tropical recreation ug uban pa alang sa langyaw ug lokal nga turista (Cordova) ug mga sikbit nga mga lugar.
Dako ang pagsalig ni Espina nga kinaiya na sa mga Filipino ang molahutay, susama sa ikaunom nga distrito dako ang iyang pagtuong mamahimo kining lider sa kalamboan pinaagi sa maong programa.
Kini suportahan unya niya og mga balaudnong maghatag og seguridad sa rural mobilization ug industriya, loan ug financial policies adto ipokus sa mga training alang sa mga mamumuo. (Edwin Ian Melecio) (BANATNEWS)