Unom drug suspects nadakpan

CEBU, Philippines - Gibalhog sa bilanggoan ang unom ka mga dinakpan sa kapolisan sa dakbayan sa Mandaue sa managlahing buy bust operations nga miresulta sa pagkasakmit sa pinutos nga shabu ug usa ka armas sulod ning semanaha.

Ang unom ka mga dinakpan mao sila si Leonilo Campaneroi, Annabel Alilin, Concordio Manatad, Vergilio Besabella, Charlie Besabella ug Oscar Sungahid Ranile nga pulos hingkod ang panuigon ug nagpuyo sa Opao ug barangay Umapad sa nahisgotang dakbayan.

Si Inspector Ramil Rodriguez, sa City Anti Illegal Drugs Special Operation Task Force (CAIDSOFT) maoy nangulo sa nagsunod nga buy bust operation nga ilang gihimo nga miresulta sa pagkasikop sa unom ka mga dinakpan.

Ang maong mga dinakpan ang mag-atubang og kasong kalapasan sa Republic Act 9165 kon illegal nga pagpamaligya og shabu ug illegal nga paghupot niini.  

Si Ranili, 49, nadakpan diha sa sitio Limonsito sa barangay Umapad, giingong nalakip sa watch list sa kapolisan, nakuha kaniya ang upat ka gagmay’ng pakete sa gituohang shabu ug ang P300 nga marked money ug armas nga adunay walo ka buhing bala.

 Matud pa ni Rodriguez, buot untang mosukol sa mga operatiba si Ranili dihang mibunot kini sa iyang armas gikan sa hawak apan naunhan niya kini sa pagpasalba sa iyang armas.

 Si Sr. Supt. Noel Gillamac, director sa Mandaue City Police Office sa iyang bahin mipadayag nga hingusgan pa nila ang mga operasyon batok sa illegal nga drugas ug mga armas. (ug Bong Soriano)   (BANATNEWS)