Roxas mihagit sa Lakas: Kumbinseha ang mga Cebuano

CEBU, Philippines - Gihagit ni Senador Mar Roxas nga kandidato pagka-bise presidente sa partido Liberal, ang partido sa administrasyon nga sulayan sa pagkumbinser ang mga Sugboanon ug mga Bisaya mismo ug dili lamang ang mga politiko sa Kabisay-an.

Kini agi’g tubag sa pangangkon ni kanhi Defense Sec. Gilbert Teodoro nga ubay-ubay’ng gobernador sa Kabisay-an ang miitsa sa ilang suporta ngadto kaniya.

Sumala pa ni Roxas nga sa pagkakaron masaligon siya nga ang tinguha sa standard-bearer sa Liberal nga si Senador Benigno “Noynoy” Aquino III alang sa limpyo, matinud-anon ug wala’y pagdapigdapig nga panggobyerno maoy makakumbinser sa mga Bisaya pagbotar kanila sa Mayo 2010.

“Hinahamon natin ang administrasyon: ang mga Cebuano at Bisaya mismo ang subukan nilang kumbinsihin, hindi lang ang mga pulitiko sa Bisaya,” si Roxas nagkanayon.

“Ang mga nasa poder, may kani-kaniyang manok. Pero alam natin na ang lahat ng Pilipino, lahat ng taga-Visayas, kaisa natin sa laban para sa tuwid at tapat na gobyerno,” dugang pa niya.

Si Roxas, kinsa usa usab ka Bisaya, mideklarar nga ang mga Pilipino nagkahiusa aron ilisan ang kasamtangang pamunoan og mas tinuod ug makahatag og klarong kausaban sa nasud.

“Ang Kabisayaan, hindi balwarte ng iilan kundi tahanan ng taumbayang naghahangad ng tunay na pagbabago,” matud niya.

Si Aquino dinhi sa Sugbo niadtong Biyernes ug mitambong sa presidential forum nga gipasiugdahan sa mga magpapatigayon.

Samtang si Roxas uban ni Senador Benigno ‘Noynoy’ Aquino mianhi sa Sugbo kagahapon alang sa usa ka rally sa mga senatoriables sa Liberal Party kagahapon didto sa Argao, Dumanjug, Toledo, Mandaue, ug Lapulapu.

Ang LP gisugat ni LP gubernatorial candidate Hilario Davide III diha sa Argao uban ni bise gobernador Greg Sanchez ug ang mga lokal nga kandidato sa LP sa lungsod uban sa 6 mil ka supporters.

Gilakbitan usab sa duha ang pagpahibalo sa mga Sugbuanon nga di kamahayan kung si Davide maoy ilang pilion pagka-gobernador gumikan sa maayong kagikan niini.

Gitambungan usab sa grupo ang pormal nga pagbukas sa People Power Museum sa Mactan Marina Mall nga gipanag-iya sa kandidato sa LP pagkamayor sa dakbayan sa Lapulapu nga si Efrain Pelaez Jr. diin ila usab gikahimamat si Atty. Eugene Espidido nga kandidato pagka kongresista sa lone district sa dakbayan sa Lapulapu ug ang mga lokal nga kandidato niini.   (BANATNEWS)