Lola gipatid-patiran namatay

CEBU, Philippines - Usa ka tigulang babaye ang namatay human gipatidpatiran sa silingang lalaki gumikan lang sa panagsungi kabahin sa kanding sa suspek nga giyab-an og init tubig sa biktima diha sa barangay Agus, dakbayan sa Lapulapu niadtong milabay'ng adlaw.

Ang namatay mao si Josefa Amistad, 60-anyos ug ang suspetsado mao si Randy Divinagracia, 26 anyos ug pulos nagpuyo sa maong dapit.

Sumala pa sa kapolisan, nahitabo ang pasangil sa suspek diha sa biktima niadto pang milabay'ng Disyembre sa miaging tuig dihang nakabuhi ang kanding sa suspetsado ug gipangaon ang mga tanom sa biktima sa tugkaran sa panimalay niini.

Si PO3 Dioscoro Arong sa Homicide Section sa kapolisan sa nahisgutang dakbayan miingon nga nagkabikil ang managsilingan dihang ang kanding sa suspetsado giabog sa biktima pinaagi sa pagbubo og pinabukalang tubig nga maoy nakaingon sa pagkapaslot sa panit sa maong mananap.

Ang suspek gikatahong ning bag-uhay lang nakadawat og impormasyong ang biktima maoy miyabo og init tubig sa iyang kanding.

Niadtong milabay'ng adlaw, gikatahong nasigpatan sa suspek ang biktima diha sa tindahan sa ilang silingan samtang ang naulahi namayad sa iyang utang.

Diha-diha giduol kini sa suspek ug gikomprontase bahin sa iyang kanding ug gisukmatan ang biktima.

Bisan paman sa kasuko sa suspek gikatahong gisumbalik sa biktima og komprontase ang suspek hinungdan sa ilang mainitong panaglalis ug niining tungura gipatidpatiran ni Divinagracia ang biktima makadaghang higayon hangtud nga kini nalup-og sa yuta.

Ang suspek dali dayong mibiya sa lugar samtang gitabang sa mga tawo si Amistad ug gidala sa Mactan Doctor Hospital sa barangay Basak sa maong dakbayan apan gideklarar kining patay nang nahidangat sa maong tambalanan.

Ang suspetsado kinsa nagpabilin pang gawasnon hangtod niining panahona ang gikatakdang pasakaan og kaso sa kapolisan.    (BANATNEWS)