CEBU, Philippines - Dili pabor si Kongresista Gilbert Remulla sa tinguhang armasan ang tanang sakop sa media nunot sa nahitabong pagpamatay sa daghang mga journalist lukop nasud kondili kadto lang mga dunay direktang hulga sa kinabuhi.
Gipadayag ni Remulla atol sa pagbisita dinhi sa Sugbo nga kun siya maoy pabut-on kadto lang mga sakop sa media nga nag-atubang og seryosong hulga sa kinabuhi ang angayang hatagan og konsiderasyon sa kapulisan nga katugutang makadala og armas isip proteksiyon. Si Remulla nga kanhi usab reporter ug broadcaster sa ABS-CBN mipasabot nga dili usab makaayo sa mga sakop sa media nga magdaladala og armas ilabi na niadtong mga field reporters.
Gihulagway niyang makahagit hinuon sa uban ang maong talan-awon.
Nunot niini gipadayag ni Remulla nga lisud na gyud nga mapasar pa ang magna carta for journalist sa Kongreso nunot niining duha nalang ka semana ang nahabilin sa dili pa mo-recess ang Kongreso nunot ning nagsingabot nga eleksyon karung bulan sa Mayo.
Si Remulla nga maoy usa sa proponent sa maong balaudnon paghatag og proteksiyon sa tanang tigbalita sama sa insurances, benepisyo, proteksyon, hustong sweldo ug katungod ilabi na niadtong mokober sa mga delikadong lugar. Nga sumala pa niya maoy hinungdan sa pipila ka mga mediamen nga mosulod nalang usab sa mga illegal nga pangwarta ug sa gitawag nga ‘envelopmental journalism’ kon kadtong manawat og kwarta gikan sa mga iligalista.
Giawhag ni Remulla ang mga tigbalita sa nasud nga awhagon ang mga kongresista nga suportahan ang maong balaudnon atol unya sa pagbalik sa sesyon sa sunod nga Kongreso.
Si Remulla anaa na sa ikatulo ug katapusang termino pagka kongresista sa Cavite ug nagpapili pagka-senador ubos sa Nationalista Party ni presidential aspirant Senador Manuel Villar. (Darrel Carumba ug Romeo Limpangog) (BANATNEWS)