3 patay sa managlahing aksidente

CEBU, Philippines - Tulo ka mga tawo ang patay sa managlahing aksidente sa kadalanan dinhi sa lalawigan ug sa dakbayan sa Sugbu sa milabay’ng adlaw.

Patay si Richard Nueva, 38, samtang naangol ang 17-anyos niining anak nga iyang angkas nga si Franklin Nueva, dihang gikasungag sa ilang motorsiklo ang usa ka dumptruck diha sa barangay Ilihan lungsod sa Tabogon niadtong Miyerkules sa alas 5:30 sa hapon.

Matud pa ni PO1 Dario Santaterisa sa Tabogon Police dihang nahinabi sa Banat News nga gikan ang mga biktima sa barangay Mabuli paingon sa kasadpang bahin ug pag-abot sa maong lugar gikasugat niini ang dumptruck nga gimaneho ni Peter Enanor, 45.

Sa imbestigasyon sa kapolisan ang mga biktima kusog kaayung nagpadagan ug mikawat sa pikas linya diin gikasugat ang truck, ang duha gidala sa Verallo Memorial District Hospital sa siyudad sa Bogo apan gideklarar nga dead on arrival si Richard tungod sa seryusong kadaut sa ulo niini samtang nalandig sa tambalanan ang anak niini nga padayung gi-atiman sa mga doctor.

Samtang ang drayber sa dumptruck boluntaryo sab dayung mitahan sa kapulisan.

Laing naaksidente mao ang usa ka batang naligsan ug namatay human maguroy sa Ceres bus samtang nagpalit og papel pasado alas-7 sa buntag nga giilang si Nysa Pagansan, 6, diha sa barangay El Pardo lungsod sa Boljoon human kini maligsi ni Malven Sanchez Roamano, 44.

Nasayran nga ang biktima padulong moeskwela uban ang duha ka igsuon ug mihapit sa tindahan aron mopalit og papel apan sa iyang paglabang napunggit kini sa maong bus.

Wala dayon makahunong ang bus ug naguroy kini pipila ka metros sumala pang PO3 Reynaldo Rollon sa Boljoon Police Station nga nahinabi sa Banat News. Gidala unta sa tambalanan ang bata apan gideklarar kining patay na.

Laing bata ang namatay kagahapon sa kaadlawon human maligsi og multicab sa Pier 3 pasado alas 9 sa miaging adlaw ug giilang si Josmar Heredia, 9, taga McArthur Blvd. samtang ang nakaligis niini nailhan usab nga si Rodulfo Artiaga Jr.

Sa pakighinabi kang Manuel Tagaan sa Cebu City Traffic nagkanayon base sa gitug-an sa inahan sa bata nga nagsakay-sakay sa bisekleta ang biktima dihang napunggit ni Artiaga.

Si Artiaga na maoy midala sa bata ngadto sa Cebu City Medical Center ug nananghid kini sa amahan sa biktima nga muoli usa aron mokuha ug kwarta apan gikatahong wala kini mibalik, kagahapon nakontak ang suspek ug misaad nga mopakita sa awtoridad - Uban ni Lesley Caminade (BANAT NEWS)