CEBU, Philippines - Mitahan sa kapolisan niadtong miaging hapon ang usa ka construction worker nga bana nga midunggab sa iyang asawa ug sa kabit niining silingan sa dihang iyang nasakpan sa akto nga naghilawas sulod sa ilang panimalay sa sitio Kawayanan, barangay Yati, lungsod sa Lilo-an.
Si Ern (tinuod nga ngalan gipugngan), 33, gi-ubanan sa iyang abogado nga si Atty. Isidro Avenales nga mitahan sa Lilo-an Police Station. Kasamtangan karon siyang gitanggong samtang nagpaabot pa sila og tukmang kaso nga ipasaka sa mga biktima batok na niini.
Apan si SPO1 Marcelino Cervilla, imbestigador sa kapolisan sa Lilo-an, nagkanayon nga niadtong Miyerkules sa hapon mitahan si Ern nga gi-ubanan sa iyang abogado.
Kun mapupos ang 36-oras karong adlawa ilang buhian si Ern kun walay complainant batok sa iyang pagpanunggab sa iyang asawa ug kabit niini.
Si SPO1 Cervilla mibutyag nga ila na hinuong giandam ang kasong adultery batok sa asawang si Leenje (tinuod nga ngalan gipugngan) ingon man ang kasong concubinage ngadto sa kabit niining si Romeo Borres tungod kay desididong mosang-at niini si Ern.
Gibutyag ni Ern nga nagtrabaho siya isip contruction worker ug duha ka adlaw duna sila'y gitrabaho diha sa dakbayan sa Talisay apan gisurpresa unta niya ang iyang asawa apan sa iyang pag-abot sa balay nadungog niya ang tingog sa lalaki.
Gumikan kay nakulbaan siya kun nganong dunay lalaki sulod sa ilang panimalay hinay siyang misulod ug gipasiga ang lighter ug gipunit ang kutsilyo nga gipatong sa lamesa sa kusina dayon gisulod ang ilang kwarto.
Maoy iyang nakita ang iyang asawa ug kabit niini nga puwerting lingawa sa ilang panaghilawas hinungdan nga gihansakan gilayon niya ang lalaki sa kutsilyo makadaghang higayon ug ang iyang asawa.
Human niini, dali siyang misibat palayo sa lugar ug wala na siya makahibalo kun unsay sunod nga nahitabo niini, apan sa report sa Lilo-an Police Station ang ilang mga silingan maoy nanawag og polis nga dunay pagpanunggab nga nahitabo.
Ang iyang asawa ug ang kabit niini gikatahong nagpaalim karon sa ilang mga samad dinunggaban sa Vicente Sotto Memorial Medical Center. - BANAT NEWS