6-anyos gipusil, patay

CEBU, Philippines - Patay nang naabot sa tambalanan ang usa ka 6-anyos nga batang babaye human kini gipusil sa wala mailhing mamumuno pasado alas 11 sa miaging buntag sa sitio Balaw, barangay Sudlon ning dakbayan sa Sugbo.

Si Mary Joy Chan Responde, nakaangkon og samad pinusilan sa tuong bahin sa iyang tiyan. Patay na kining naabot sa Cebu City Medical Center.

Nasayran nga ang amahan sa biktima nga si Julian Responde uban sa pag-umangkon niini nga si Charry paingon sa ilang payag samtang gikan nagsusi sa tinanom nilang talong.

Sa dihang pipila na lang ka metros ang gilay-on paingon sa payag nila, adunay nadungog nga boto sa armas ang amahan hinungdan nga dali niya kining gisusi.

Apan nakita nalang sa amahan nga naglunang na sa kaugalingon niyang dugo ang iyang anak nga babaye.

Sa pakighinabi sa Banat News ni PO3 Michael Codaste sa Homicide Section, kini nagkanayon nga sa wala pa mahitabo ang pagpamusil, ang bata maoy nahibilin sa panimalay kauban ang inahan niining baldado.

Dugang pa ni PO3 Codaste nga ang biktima ug ang inahan nagkalingaw og tan-aw og salida sa telebisyon sa dihang gikalit lang kini og pusil sa wala mailhing mamumuno.

Nagduda ang kapolisan nga gidul-it sa pagpusil ang bata diha sa iyang tiyan.

Ang kapolisan nagsubay sa pipila ka anggulo sa pagpusil patay sa bata. Usa na niini mao ang kontra sa pamilya sa biktima ug ang ikaduha posibleng kawatan ang namusil tungod kay gikatahong adunay manghilabot sa tinanom nga talong sa pamilyang Responde.

Nasayran usab nga ang maong talong nga gibantayan sa pamilyang Responde iya sa anak niining si Jonathan. Mo-ani ang pamilya og dili mominos usa ka libo ka kilong talong kada semana. -  BANAT NEWS