Naligong hubog nalumos patay

CEBU, Philippines - Patay na nga napalgan niadtong Martes sa hapon sa mga rescuer ang usa ka lalaki nga giingong hubog ug nalumos samtang naligo sa dagat uban sa iyang higala didto sa Juanito Beach sa barangay Poblacion, dakbayan sa Talisay.

Ang nalumos giila sa mga polis nga si Michael Niones, hingkod, nga taga sitio San Roque, barangay Mambaling dakbayan sa Sugbo.

Si Niones nadala pa ngadto sa Talisay City District Hospital apan wala na kini makaabot nga buhi sa maong tambalanan.

Base sa imbestigasyon sa mga polis, si Niones uban kang Mark Relente, hingkod usab ang panuigon, nga iyang silingan nagsakay-sakay og salbabida apan kalit lang kining natikyaob dihang gihapak sa dakong bawod hinungdan nga ang duha nabuwag sa salbabida.

Si Relente maoy nakalangoy paingon sa baybayon apan si Niones kinsa giingong hubog, nawagtang sa dagat.

Sa laing bahin ang kapolisan sa dakbayan human madawat ang maong alarma milihok dayon pinaagi sa pagpanguna sa ilang hepe nga si Superintendent Henry Binas ug miadto dayon sa dapit nga nahitaboan.

Uban sa suporta sa mga sakop sa Talisay Rescue Action Team (TREAT) ug sa mga volunteer lifeguard nga sila si Roland Remolino, Junnarius Arnival ug William Play ug sa estambay nga si Michael Delima , nagtinabangay sila sa pagpangita kang Niones.

Si Niones napalgan sa mga rescuer sulod sa tulo ka oras gikan sa pagkawagtang niini didto na sa kadagatan sa sitio Kalubihan, barangay Poblacion nga may gilay-ong 100 metros gikan sa gikaligo-an niining beach resort. - BANAT NEWS