Kritikal ang kahimtang

CEBU, Philippines - Kritikal ang kahimtang sa usa ka mag-uuma human kini pusila samtang nanihapon kauban sa iyang kapuyo ug mga bata sulod sa ilang balay didto sa bukirang bahin sa barangay Bae, lungsod sa Sibonga, niadtong Martes sa sayong gabii.

Ang biktima mao si Melanio Revera, hingkod, ulitawo, apan dunay kapuyo, usa ka mag-uuma, nga taga Bae.

Si PO3 Estanislao Chavez sa Sibonga Police Station mibutyag sa Banat News nga ang biktima kauban ni Evangelene Panes, nga iyang ka-live-in ug duha niini ka mga anak ( sa iyang tinuod nga bana), dihang gipusil sa wala hiilhing kriminal tulo ka higayon ang biktima.

Matud pa sa kapolisan nga gipasulod sa kriminal ang sumbohan sa iyang armas de fuego sa bongbong sa balay sa biktima ug gipunting ang lawas niini.

Ang biktima nakaangkon og mga samad sa bala sa iyang bukobuko ug sa iyang kilid, samtang misibat dayon ang kriminal human sa maong pagpamusil.

Gihatod dayon ngadto sa South General Hospital sa siyudad sa Naga ang biktima nga diha sa talandugong kahimtang.

Ang miresponding kapolisan nakapunit og duha ka kabhang sa bala sa kalibre .45 nga pistola sa dapit nga nahitaboan ug usa ka nalumping na nga tingga sa maong bala.

Padayon pang gisuta sa kapolisan ang motibo sa maong pagpamusil ug si kinsa usab ang mihimo sa ingon. - Darrel A. Carumba (BANAT NEWS)