Dumpit andam motahan: Derilo

CEBU, Philippines - Si SPO1 Adonis Dumpit mipadala na og feeler nga motahan human nagtagotago pipila ka adlaw human nalutsan og warrant of arrest sa kasong murder tungod sa pagpusil-patay kang Ronron Go.

Si Supt. Rex Derilo, hepe sa Regional Security Agency and Guards Supervisory Units (RSU) nga maoy labaw ni Dumpit, nga dunay komunikasyon nga iyang nadawat gikan sa mga higala ni Dumpit nga gipadangat usab ngadto kaniya.

Matud pa niini nga hangtod karon, wala pa sila magka-estorya ni Dumpit sukad ang NBI-7 mi-serve sa warrant sa kasong murder diha sa iyang opisina sa dalan R.R. Landon.

Gipadayag niini nga si Dumpit misang-at og “leave” bali’g lima ka adlaw human kini mananghid kaniya og 15 unta ka adlaw sa wala pa malutsi og warrant ug hangtod karon dunay panahon nga iyang tawgan ang cellphone niini ug igo lang mo-ring ug dili tubagon.

Hinuon, iyang gitambagan si Dumpit sa dihang wala pa molusot ang warrant sa pag-asikaso sa iyang kaso.

Samtang si Police Regional Office-7 director Chief Supt. Lani-O Nerez mikonpirmar nga kagahapon sa buntag miduaw ang inahan ug pamilya ni Go sa iyang buhatan ug nagpatabang aron madakpan si Dumpit subay sa warrant.

Si Nerez miawhag kang Dumpit sa pag-surrender aron atubangon ang kaso.Matud pa ni Nerez nga unsay mando sa korte among ipatuman sanglit mao man kini tahas sa kapulisan hinungdan nga akong gimanduan si Derilo sa pag-locate ni Dumpit.

Matud ni Nerez nga nakasabot hinuon siya sa gibati ni Dumpit karon nga gipangita kini sa balaod tungod sa kahadlok nga isagol niadtong mga kriminal nga iyang nadakpan ug napapriso. – BANAT NEWS