Ex-councilor sa sta. fe gipusil patay

CEBU, Philippines - Gipusil patay ang kanhi konsehal sa lungsod nga giingong lider sa mga political supporters sa mayor sa lungsod sa Santa Fe ug sa mga Martines sa ikaupat nga distrito sa Sugbu niadtong gabii sa adlaw'ng Domingo.

Ang biktima nga namatay diha-diha human dul-iti pagpusil sa ulo mao si Prosbito Batiancila, 56, molupyo sa sitio Tingtingon barangay Marikaban, sa maong lungsod ug kanhi konsehal sa maong lungsod ug kasamtangang nagtrabaho isip kaswal nga kawani sa munisipyo.

Ang kapolisan wala pa makatumbok kun si kinsa ang tawong mipatay sa biktima sanglit dali kining nakaikyas luwan sa usa ka motorsiklo, usa sa gitutukang anggulo karon sa kapolisan mao ang posibilidad nga kalambigitan sa politika.

Si Batiancela gikatahong political leader sa incumbent mayor Jennifer Illustrisimo, gisuwayan sa Banat News pagkuha ang habig sa mayor apan napakyas ang maong tinguha.

Matud pa ni SPO1 Antonio Illut sa Santa Fe Police dihang nahinabi sa Banat News ang biktima mibisita sa pinuy-anan sa iyang pag-umangkon niadtong higayuna ug samtang naglingkod sa kusina kalit lang kining gipusil.

Sumala pa sa kapolisan gilipot sa luyo ang biktima sa mamumuno nga gidudahang anha lang gipalusot ang sumbohan sa armas sa bungbong diin mag-atubang ang likod sa biktima dayong pusil niini makausa ka higayon sentro sa luyong bahin sa ulo nga nakaingon sa hinanali niining kamatayon.

Subay sa gihimong imbestigasyon sa kapulisan usa ka bata ang nakakita og tawong nagdali-dali pagsakay og motorsiklong kolor pula nga naka-helmet ang daling misibat pahilayo sa maong lugar human sa hitabo.

Dugang nahipos nga report gi-parking sa maong lalaki ang motorsiklo daplin sa dalan ug naglakaw kini padulong sa balay diin gipatay ang kanhi konsehal.

Si Sr. Supt. Erson Digal, ang director sa kapulisan sa lalawigan sa Sugbu miingon nga sa pagkakaron dili pa sila dayon makaingon nga election related ang pagpatay kang Batiancela sanglit posibleng duna kini laing kontra.

Samtang di usab siya motuong ang maong krimen mamahimong hinungdan nga mabutang sa Comelec control ang lungsod sa Sta. Fe. sa election sa Mayo. Gikumpirmar niini nga dugay nang lider ug supporter sa pamilyang Martinez, igsuon usab niini si Kapitan Prospero Batiancela sa maong barangay nga supporter usab sa mga Martinez.

Matud pa niini nga ang maong lugar kabahin gyud sa election watch list sa Comelec gumikan usab sa mga panghitabo sa nanglabay’ng election lakip na ang kinatibuk-ang Isla sa Bantayan.   (BANATNEWS)