Sinulog awarding nagmabulukon

CEBU, Philippines - Nahimong mabulokon ang awarding ceremony sa Sinulog dance contest sa Cebu City Sports Center pinaagi sa pag-ila sa mga nakatampo sa kalampusan sa ika-30 ka tuig nga Sinulog ug paghatag og pasidungog sa mga unang incorporators sa Sinulog Foundation, mga unang tunghaan nga nanayaw sa unang Sinulog niadtong 1984 ug sa Father of Sinulog nga si kanhi Customs Collector David Odilao Jr.

Kagahapon gipasidunggan sa Sinulog Foundation ang mga mananaog alang sa Street Dancing, Free Interpretation ug ang Sinulog Based category.

Sa street dancing category, ang nakakuha sa ikatulo nga ganti mao ang the Land of Beauty and Bounty nga lalawigan sa Lanao del Norte; ikaduha ang Lumad Basakanon ug ang nakakuha sa unang ganti mao ang Tangub City, Sinanduloy Cultural Troupe.

Samtang sa Free Interpretation category, ang nakakuha sa ikalimang ganti mao ang Mabolo Elementary School; ikaupat ang lalawigan sa Lanao del Norte; ikatulo ang Pinta Flores sa dakbayan sa San Carlos nga mao usab ang nakakuha sa Best in Costume; ikaduha ang Lumad Basakanon ug ang nakakuha sa unang ganti mao ang Tribu Himag-ulaw sa Placer, Masbate.

Sa Sinulog Based Category, ikalimang ganti ang Don Sergio Osmeña Sr. Memorial National High School; ikaupat ang barangay Lahug; ikatulong ganti nakuha sa Silaw Culture and Arts nga gilangkoban sa mga estudyante sa high school sa Carcar nga mao usab ang nakakuha sa Best in Costume; ikaduhang ganti ang Abellana National School samtang nakuha sa Sinanduloy Cultural Troupe sa Tangub City ang unang ganti.

Matud pa sa mga hurado sa Sinulog nga sila si Dr. Larry Gabao, Nestor Jardin, ug Lordinio Vergara nga ang ilang gipamili mihaom usab sa ilang tema nga ipabalik ang karaang presentasyon sa Sinulog.

Dugang pa niini nga adunay kalahian sa mga nakadaog sa unang ganti tungod kay ang ilang mga sayaw lahi ra sa mga miaging tuig nga gihulagway’ng "exciting choreography and unique."

Gihulagway usab sa mga hurado nga ang mga nakadaog mipakita sa 'traditional way' sa pagsayaw sa Sinulog.

Si Ricky Ballesteros, executive director sa Sinulog Foundation, nagkanayon nga mapasalamaton siya sa mga entrante nga mihalad sa ilang sayaw. Matud niya kun wala pa sila wala usab ang Sinulog.

Matud ni Ballesteros nga nagkadaghan ang mga entrante sa Sinulog.

Nahunahunaan sa Sinulog Foundation nga adto na himuon sa South Road Properties (SRP) ang Sinulog dance contest sunod tuig tungod sa kadako sa lugar ug sa kalapad niini diin dili na maghuot ang mga tawo nga gustong mosaksi sa selebrasyon.

Si Mayor Tomas Osmeña sa iyang mensahe atol sa closing ceremony nagkanayon nga nagmalampuson ang ika-30 ka tuig nga Sinulog. Iyang gihulagway nga hapsay ang Sinulog.

“Dako kaayo ang akong pasalamat kay okay kaayo ang gipakita nga disiplina sa crowd. Dako ang akong pasalamat sa tanang mihatag og kooperasyon sa atong kapistahan,” nagkanayon si Osmeña.

 Matud pa niya nga dako usab ang iyang pasalamat nga daling nalimpiyo ang kadalanan sa dakbayan human sa kapistahan. Gipadayag usab sa mayor ang dako niya nga pasalamat kang Bise Mayor Michael Rama kinsa mao ang chairman sa Sinulog Foundation.

 Gihulagway usab sa mayor nga paghulma sa Sinulog maoy bunga sa dakong inspirasyon kang Señor Sto. Niño. (BANATNEWS)