Haiti angay i-ampo - Cardinal Vidal

CEBU, Philippines - Bisan sa paghabo-habo sama sa nangaging mga adlaw sa pagsugod sa mga kalihukang relihiyoso pahinungod sa Senyor Santo Niño wala kini nahimong babag sa debosyon sa mga tawo.

Sa napulo ka minutong wali kagahapon sa Arsobispo sa Sugbo Ricardo Cardinal Vidal sa gipahigayong Misa Pontipika giawhag niya ang mga deboto ni Santo Niño sa pag-ampo alang sa nasud sa Haiti diin gitay-og kini sa kusog nga linog sa milabay'ng mga adlaw ingon man ang pag-atiman sa atong kalikupan.

Kahinumduman nga sa nahitabong linog sa Haiti daghan ang mga nangamatay ug nangaangol ug misamot kalisod karon ang sitwasyon sa maong nasud tungod kay bag-uhay palang natapos ang gubat sibil sa ilang nasud.

“I-ampo nato ang ilang nangamatay ug tabangan nato kutob sa mahimo tungod sila naglisod-lisod sa ilang pagpakabuhi ug panginabuhi,” ni Vidal pa kinsa mihalad sa nahisgutang Santos nga Misa alang ngadto sa Haiti.

Matud sa Arsobispo nga ang nahitabo sa Haiti pagbuot sa kinaiyahan apan dunay mga katalagman nga dili iyaha sa kinaiyahan tungod kay ginama sa tawong hakog sa gahom ug dungog. Giawhag usab niini ang panaghiusa sa tanan sa pag-amping ug pag-atiman sa kalikupan.

“Samtang magmaampuon kita ug matinabangon niadtong ‘tua sa layo, unta magpakabana gyud kita sa atong kaugalingon nga mapun-an sa kahingpitan sa mga panginahanglan sa atong tugkaran, sa atong kaugalingong kalikupan, sa atong bahin sa kinaiyahan nga gipiyal sa Dios diha kanato,” matud sa Arsobispo.

Si Vidal midugang nga ang matinud-anong deboto okupado sa iyang kalambigitan ngadto sa Amahan ug mipahinumdum usab sa usa ka matinud-anon kanunay kining mosunod sa napulo ka sugo sa Ginoo.

Gikan sa pagsugod sa Pontifical Mass hangtud sa pagtapos niini wala gihapon mohunong ang pagtaligsik, apan usa ka catholic faith defender nga kauban ni Talisay City Mayor Socrates Fernandez nga si Salvador “Boy” Montaño mitug-an sa Banat News nga sulod sa 20 ka tuig na niyang pag-alagad sa Simbahan wala sukad mahitabong tibuok adlaw'ng Domingo uwanon nga matud pa niya adlaw sa Ginoo.

Sa laing bahin, sa gipahigayong Mañanita Mass kagahapon sa alas 4:00 sa kaadlawon mikabat ngadto sa sobra sa tunga sa oras ang nahitabong brown-out diha sa Basilica del Santo Niño tungod sa short circuit.

Base sa taho sa ABS-CBN Abante Bisaya duha ka transformers sa poste sa Visayan Electric Company (VECO) nga usa niini ang nahimutang diha habig sa Osmeña Blvd. ang mibuto human nga dunay mga balloon ang nasangit sa mga poste nga giingong maoy hinungdan sa short circuit. – BANAT NEWS