CEBU, Philippines - Gibana-bana sa kapolisan nga moabot sa otso milyones ang gidaghanon sa mga debotos ug mga tawong midugok sa carousel route kagahapon ingon man sa mga nanambong sa Pontifical Mass, kaduhaon ang kasamtangang populasyon sa tibuok Sugbu kun ang census sa 2007 maoy basehan.
Miulan ug miinit apan wala gyud molurang ang gidaghanon sa mga tawong nagpunsisok sa kadalanan, matud pang Police Regional Office-7 Chief Supt. Lani-O Nerez kun basehan ang gidaghanon sa nanguyog sa fluvial procession ug solemn procession niadtong Sabado katulohon pa kini kagahapon.
Sumala pa sa report moabot sa 2.8 milyones ang gidaghanon sa mitambong niadtong Sabado, ug kun kini katulohon ka pilo moabot kini og kapin walo ka milyones.
Base sa labing uwahing census sa populasyon niadtong 2007 sa tibuok lalawigan sa Sugbu apil na ang Metro Cebu moabot sa 3.85 milyones ang mga namuyo diin ang dakbayan sa Sugbu dunay 1.46 porsiyentong growth rate.
Sumala pa ni Sr. Supt. Patrocinio Comendador ang director sa Cebu City Police Office dunay 1.4 milyones na karong residente sa dakbayan apil na ang mga transients.
Kun ang basehan mao ang pagbana-bana ni Nerez kaduhaon ang populasyon sa tibuok isla sa Sugbu sa mga nanambong kagahapon nga giisip nga maoy katapusang adlaw sa Sinulog festivities. Niadtong 2009 gibana-banang kapin sa duha ka milyon ang midugok sa samang okasyon.
Usa sa timailhang midaghan gyud ang mga tawong midayo dinhi sa Sugbu mao ang gitas-on sa solemn procession niadtong Sabado nga diin ang ulo sa prosesyon nga gipangulohan sa ‘Division 1’ misulod na sa Basilica del Santo Niño apan ang karosa sa imahen sa Balaang Bata naa pa sa dalan Borromeo.
Ang maong rota sa prosesyon may gilay-ong pito ka kilometro nga mas taas kumparar sa milabay'ng katuigan nga lima lang ka kilometro.
Lakip sa mga nagbantay kagahapon mao ang nagkadaiyang anti-crime groups, mga Barangay Intelligence Network (BIN), communicator groups ug sa Armed Forces of the Philippines (AFP) ug ubang private sectors nga mitabang usab sa pagmentinar sa kalinaw.
Duna gihapoy nakuotan
Hinuon bisan paman sa unom ka libong nagbantay duna gihapoy duha ka gipasanginlang mga mangunguot nga nadakpan sa mga sakop sa Fuente Osmeña Police Station.
Ang maong police station dunay natalang napulo ka mga kaso sa pagpanguot, tulo niini mga langyaw'ng turista ug mga naggikan sa nagkadaiyang probinsya nga nakuhaan og pitaka, cellphone ug camera.
Duna say tulo ka batang nabuwag sa inahan ug duha niini nakuha ra usab sa ilang mga ginikanan. Hinuon si Nerez nagkanayon nga walay nadawat nga report sa mga dagkong hitabo o krimen.
Samtang si Comendador sa iyang bahin miingon nga mas menus ang insidente karon sa pagpanguot kumparar sa milabay'ng 2008 Sinulog nga dunay natalang 20 ka insidente.
Si Insp. Michael Bastes hepe sa Theft and Robbery Section nagkanayon kini sa diha nga nahinabi sa Banat News nga lima ka tawo usab ang ilang nadakpan nga gikan sa Bacolod, Manila ug sa Tabunok nga gidudahang mga kawatan.
Ang selebrasyon gitapos sa fireworks display kagabii human ianunsyo ang mga nakadaog. – BANAT NEWS