Chopper sa ABS-CBN nag-emergency landing sa Tabuelan

CEBU, Philippines - Tungod sa dili maayong panahon napugos ang chopper sa ABS-CBN Central Visayas pagpahigayon og emergency landing pasado alas-11 sa buntag sa miaging adlaw diha sa barangay Poblacion lungsod sa Tabuelan.

Base sa taho nga nadangat sa Operations Branch sa Cebu Provincial Police Office (CPPO) ang maong chopper nga may body number RP-02294 gikan sa Manila giingong padulong sa dakbayan sa Sugbo aron pag-cover sa Sinulog.

Sumala pa sa kapolisan ang piloto niini mao si Capt. Jonas Liwag uban ang duha ka tripulante nga sila si Jericho Mendoza ug si Rowen Ruedas ug luwas hinuong nakatugpa.

Ang Banat News misuway og kuha og pamahayag sa maong estasyunan kabahin sa hitabo apan napakyas ang maong tinguha.

Matud pa sa report nga samtang naglupad ang maong abyon dihang nasugatan ang kusog nga ulan ug hangin. Gikatahong ‘zero visibility’ kon dili na makita ang mga palibot hinungdan nga dihang naagian nila ang barangay Poblacion sa maong lungsod gipatugpa nalang sa piloto ang abyon aron paglikay sa disgrasya.

 Samtang kagahapon atol sa fluvial procession wala’y puas ang paghabo-habo sa ulan. Sumala pa sa Philippine Atmospheric Geophysical and Astronomical Services Administration (PAGASA) ang nasinating kadautan sa panahon sukad pa niadtong adlawng Biyernes magpadayon hangtud ning adlawa.

Si weather forecaster Ella Comahig nga nahinabi sa Banat News nagkanayon nga padayon ang pagtaligsik karong adlawa dinhi sa Sugbu tungod gihapon sa low pressure dinala sa Northeast Monsoon kon hanging amihan. Dugang pa ni Comahig nga delikado usab kini sa mga helicopter o mga sakyanang molupad kini tungod kay ubos kaayo ang panganod. (Lesley Caminade)    (BANATNEWS)