Grabeng debosyon kang Sr. Sto. Niño

CEBU, Philippines - Wala’y bisan usa ka aksidenteng natala bisan paman sa dili maayong panahon sa pagpahigayon sa fluvial procession kagahapon sa buntag diha sa Mactan Channel subay sa kapistahan sa Sr. Sto. Niño ingon man sa Solemn Procession kagahapon nga gibana-banang gitambungan og kapin duha ka milyong deboto.

Ang fluvial parade gilangkuban sa 160 ka mga nagkadaiyang klase sa sakyanan sa dagat nga gisakyan usab kini ug liboang mga debotos gikan sa Ouano Wharf sa dakbayan sa Mandaue padulong sa Pier Uno sa dakbayan sa Sugbu.

Bisan sa solemn procession, liboan gihapon ang mikuyog niini ug preparado batok sa kadautan sa panahon, sama sa gihapon, daghang mga tawo ang nagpaabot diha sa daplin sa rota nga nagwara-wara sa ilang mga kamot ug panyo ngadto sa Balaang Bata.

Samtang ang Chief Master at Arms sa Philippine Coast Guard, Chief Petty Officer Rey Mendoza nga nahinabi sa Banat News  nagkadayon nga dili momenus kapin usa ka milyon ang tawong miduyog sa maong fluvial parade lakip na niini ang mga tawong nag-atang diha sa kabaybayunan gikan sa Mandaue hangtud sa Sugbu.

“The Fluvial Parade was very successful without untoward incidents that happen during the celebration,” pasabot pa ni Mendoza.

Sama sa naandan, tanang barkong mosulod sa Mactan Channel atol sa fluvial parade gidid-an una sa pagsulod hangtud nga di matapos ang kinatibuk-ang kalihukan sa dagat.

Diha sa Pier Uno sa dakbayan sa Sugbu nagpaabot usab sa liboan gihapong mga debotos pagsugat sa Balaang Bata ug sa Birhen sa Guadalupe nga gilangkuban dili lang mga hamtong kundili mga bata usab bisan sa kadautan sa panahon.

Pipila sa mga katiguwangang mitambong nga nagdala og mga bata wala nila igsapayan ang panahon sanglit ang ulan usa sa mga paboritong panahon sa mga bata aron makaduwa.

 Sa pakighinabi sa Banat News sa usa ka turista nga si Renee Estella O’Neal nga karon lamang nakasaksi sa maong kalihukan gihulagway niya kining wala’y susama kanindot nga fluvial procession.

Sumala pa niya nga karon pa siya makakita og susamang debosyon sa mga tawo nga giatangan gyud diha palang gani sa kabaybayunan hangtud na sa gidunggoan.

Dugang pa ni O’Neal nga mobalik siya sa syudad sa Sugbo kini aron saksihan og balik ang kasinatiang iyang natagamtaman dinhi.

Usa sa mga tag-iya og yati nga misalmot sa fluvial parade nga gikahinabi sa Banat News nga si Capt. Antonio Vizmanos, kini mibutyag nga sulod sa 20 na ka tuig niya kining gihimo.

Matud pa niya nga sa fluvial parade kagahapon unom ka tugboats, duha ka motor bangka ug usa ka yati nga iyang gipanag-iya ang iyang gipaapil, si Vizmanos nagkanayon nga sa gidugayon sa iyang kasinatian sa fluvial parade sa Sr. Sto. Niño nagkaanam og kadaghan ang nanambong. Si Vizmanos usa sa mga corporate owners sa Metro Cebu Tug and Marine Services Incorporated.

Ang kapolisan nagkanayon nga malinawon ug wala’y mga dagkong krimeng nahitabo sa dapit diin moagi ang prosisyon, gawas lang sa upat debotos ang nabiktima sa panguot diha sa sulod ug gawas sa simbahan sa Basilica del Santo Niño.

Duna say unom ka mga tawong nakuyapan nga mga estudyanteng nagbantay og debotos nga wala mokaon og pamahaw tungod sa pagpaabot sa Sr. Sto. Niño.

Nasayran nga adunay kapin 200 ka mga reservists ug di mominos kapin usa ka gatos ka mga CWTS ang miabag sa pag-kordon sa rota sa prosisyon gikan sa Pier Uno ngadto na sa Basilica del Sto. Niño.     (BANATNEWS)