Brodkaster mobansay sa mga batan-on

CEBU, Philippines - Ang mga kabatan-onan sa lungsod sa Barili makalaom og hayag nga kaugmaon karong giandam na ang skills training program alang sa ilang maayong ugma.

Ang miandam niini mao ang usa ka beteranong magsisibya sa radyo nga si Rene Alquizola kinsa bag-o lang miretiro ug karon mikandidato sa pagkakonsehal sa lungsod sa Barili ubos sa One Cebu Party.

Matud pa ni Alquizola nga iya nang giandam ang tanang mga modules alang sa mga batan-on sa iyang lungsod lalaki ug babaye ug wala magpili og bulok sa ilang pagkatawo ug relihiyon.

Si Alquizola kinsa nakapanglangtaw sa kabug-at nga giatubang sa mga ginikanan sa pagpatungha sa ilang mga anak sa kolihiyo , mas maayo nga ang mga batan-ong kabus apan may lantip nga pangutok kinahanglang mabansay sila pinaagi sa mga modules nga giandam sa Technical Skills Development Authority (TESDA) ug sa Cebu Technological University (kanhi CSCST).

Subay niini, gusto ni Alquizola nga makakat-on ang mga batan-ong Barilinhon sa mga skills, kun kahanas aron sila makatrabaho sa gawas sa nasud.

Gusto niya nga makakat-on sila sa “in demand” karon sa gawas, sama sa ordinaryo ug industrial welding, house ug building electrical wiring, heavy equipment driver, plumbing, pipefitting, car engine troubleshooting, ug ang pagka mason ug pintor alang sa mga lalaki.

Alang usab sa mga babaye, mahimo silang magto-on sa basic ug advanced cooking ug sa garments kon pagpanahi.

Sa central office sa TESDA sa Metro Manila, matud ni Alquizola, ang mga babaye ordinaryo ra kaayong makita nga nagbansay-bansay sa welding ug engine trouble shooting.

Karon inilog kini sila sa mga dagkong industrya, sama sa ship building sa Balamban dinhi sa Sugbo ug sa Subic, Zambales.

Si Alquizola, kinsa usa ka retired radio station manager sa DYMR Radyo ng Bayan Cebu, natudlo nga miyembro sa Board of Trustees sa CSCST kaniadto.

Didto niya masinati sa 10 ka mga campus sa CSCST, ang lain-laing matang sa bansay-bansay ug mga entrepreneurial project nga angay sa mga wala makatiwas sa pag-eskuwela.

Malaumon usab kaayo si Alquizola nga ang CSCST (karon CTU) agriculture campus sa Cagay, Barili dako og ikatampo niining iyang mga tinguha.

Ang mga gradwado sa programa matud ni Alquizola hatagan og assistance aron makapasar sa trade test kay mao kini ang labing importante aron makapangita og trabaho sa gawas sa nasud, dugang pa niya.

Isip ubos sa landong sa partido One Cebu nga gipangunahan ni Gobernador Gwen Garcia mibati og kalipay dihang gisuportahan ni Kongresista Pablo John Garcia ang iyang plano sa Barili.

Matud niya nga ang karaang hospital building sa Boloc-boloc, Barili maoy iyang himoong training school, ug adto niya buksi   ang satellite office sa TESDA.

Ang laing lugar nga iyang napili mao ang sulod sa campus sa Cebu Technological University sa barangay Cagay, Barili diin adto usab niya buksan ang training sa livelihood projects sama sa modernong pamaagi sa hog raising, poultry, goat ug cattle breeding, raising and fattening.

Ang maong campus mao usab ang lugar diin iyang sugdan ang usa ka tree nursery sa mga indigenous kon karaan ug mga talagsa-on nang makita nga mga kahoy sama sa tugas, bayong, ipil, magkono ug uban pa.

Ang mga kauban ni Alquizola sa line up sa One Cebu sa Barili mao sila si : Dr.Teresito Marinas, mayor, Marlon Garcia, vice mayor. Pagka SB members, si kanhi vice mayor Loy Ponsica, kanhi konsehal Hector Celis, si kapitan Ted Caumeran sa barangay Poblacion, ug mga incumbent nga sila si William Ouano, Casildita Alquizola ug Fredo Pabroa.   (Wen Celen)    BANATNEWS)