CEBU, Philippines - Edukasyon alang sa tanan dili lang para sa mga adunahang kabataan kundili alang usab niadtong mga kabus apan dunay abilidad nga molambo basta mahatagan lang og tsansang makat-on.
Kini maoy usa sa mga nakitang babag sa usa sa mga kandidato sa pagka-kongresista sa siksto distrito nga si Rene ‘r.e.’ Espina nga naila usab nga usa ka international economist, nga ang nasud molambo ug maka-compete sa ubang kanasuran.
Matud pang Espina, sama sa gisulti sa Nasudnong Bayani nga si Dr. Jose Rizal nga ang kabataan maoy paglaom sa nasud.
Sumala pa niya nga ang kabataang dunay ambisyon sa kinabuhi kinahanglang matabangan ug kini mahimong mahatag sa gobiyerno pinaagi sa paghatag og scholarship sa kinabag-an ug dili lang sa mga piniling kabataan sa kabus nga sector kundili alang sa tanan.
Matud pang Espina nga kun siya’y palarong makalingkod sa ikaunom nga distrito usa sa iyang nahuna-hunaang matabang sa nasud mao ang paghimo og balaudnon nga mass education program.
Kini mopokus gyud sa mga kurso sa natad sa siyensya, teknolohiya, makinarya, imprastraktura ug impormasyon sama sa gibuhat sa ubang nasud tungod kay kun dunay daghang susama og kamahoang kabataan ang Pilipinas dako kaayo ang tsansang maibanan kundili man hingpit nga mapapas ang kapit-os ug kakabus sa nasud.
Buot nga sundon ni Espina ang gihimo sa Estados Unidos nga ang buhis sa local nga kagamhanan itagana gyud alang sa kabataan sa ilang mga dapit, samtang ang kitaon usab sa Philippine Amusement and Gaming Corporation (Pagcor) adto gyud tanan mapadulong sa edukasyon.
Samtang ang mga kolehiyo wagtangan og buhis apan kinahanglang ang ilang kitaon adto padulong sa pasilidad ug pagpataas sa suhulan sa mga magtutudlo.
Gihulagway ni Espina ang sistema karon sa edukasyon sa nasud gihimong negosyo, wala’y tumong ug nawala na ang krusada maong gihulagway niyang mas epektibo pa ang mga leksyon ug pamaagi sa kinaraan kumparar karon nga di gani makasabot og English.
“English is a language of science and technology. Without science and technology, the country stands a greater chance of going backwards,” matud pang Espina nga iyang gikutlo sa pamulong sa kanhi Primero Ministro sa Singapore nga si Lee Kwan Yew. (Edwin Ian Melecio) BANATNEWS)