Edu wa kawad-i og paglaum sa One Cebu

CEBU, Philippines - Giangkon ni vice presidential aspirant Edu Manzano nga padayon pa ang iyang pagpangulitawo sa One Cebu Party aron siya suportahan sa iyang kandidatora sa umaabot nga piniliay sa tuig 2010.

Atol sa iyang pagbisita kagahapon sa barangay Ermita ug sa mga tunghaan ug sanga sa University of Cebu sa dakbayan sa Sugbu ug Mandaue nalipay siya sa mainitong pagdawat kaniya sa mga tawo ug tinun-an.

Sa press conference diha sa Park Mall, si Manzano mipadayag sa mga sakop sa media nga iyang giuna sa pagkakaron ang direktang pakighimamat sa mga residente sa nagkadaiyang dapit dinhi sa lalawigan.

Hinuon nalipay siyang dili pa sarado ang One Cebu Party kung kinsa ang ilang suportahan pagka-bise presidente sa umaabot piniliay hinungdan nga wala siya kawad-i og paglaom.

Si Manzano maoy kapares sa standard bearer sa administrasyon nga si Guilbert “Gibo” Teodoro kinsa una nang gipadayag sa One Cebu Party nga maoy presidential candidate nga ilang suportahan atol sa pagpahigayon sa ilang partido sa ilang asembliya.

Nalipay usab siyang si Lapulapu City Mayor Arturo Radaza atol sa ilang panagtagbo mipadayag nga mosuporta kaniya.

Pipila usab ka mga mayor ug mga politiko sa lalawigan sa Sugbu ang gipangangkon ni Manzano nga mipadayag na usab og suporta kaniya, apan dihang gipangutana si kinsa sila nagdumili kini paghingalan. – BANAT NEWS