Rota sa prosesyon sa Pista Senyor

CEBU, Philippines - Ang prosisyon anha manukad sa Basilica Del Santo Niño mogawas kini ngadto sa dalan Magallanes diretso sa dalan A. Borromeo, liko diha dapit sa Gaisano South sa dalan Leon Kilat agi sa GSIS lahos sa Asian College of Technology (ACT).

Gikan sa ACT modiretso kini ngadto sa dalan J. Alcantara tadlas ngadto sa University of San Carlos (USC) Girls High liko paingon ngadto sa dalan V. Rama Avenue ug moliko sa dalan B. Rodriguez lahos sa agi sa Fuente Osmeña ug mosubay sa Osmeña Boulevard dayon lahos na balik sa Basilica.

Pamaagi paghusay sa drug cases angayang usbon

Personal nga gitambongan ni kanhi Dangerous Drugs Board Secretary Sen. Tito Sotto ug PDEA Usec. Atty. Clarence Paul Oaminal ang hearing sa gibansagang ‘Shabu 11’ diha sa RTC Branch 28 sa dakbayan sa Mandaue kagahapon sa hapon.

 Ang kaso anha gihusay sa sala ni Judge Marilyn Yap diin gipresentar sa depensa ang usa ka ebidensyang giingong nagtumbok nga usa ka ahente sa Philippine Drug Enforcement Agency nga may kalambigitan sa katukoran sa shabu laboratory diha sa barangay Omapad.

Ang depensa mipresentar og resibong nagpakita nga usa ka PDEA agent maoy nagpalit sa mga kahimanang gamiton alang sa operasyon sa maong laboratoryo nga diin madakpi ang onse ka mga lalaki nga naglakip sa mga langyaw’ng Intsik.

Si Sotto sa iyang bahin nagkanayon nga normal na sa mga akusado nga ilang ipahid ang salaod ngadto sa mga ahenteng maoy nakasakop kanila.

Samtang gipasabot ni Sotto nga ang iyang pagtambong sa maong kaso mao ang pagtuon unya sa posibleng isang-at niyang House Bill nga mag-usab sa pamaagi sa pagdungog sa mga kaso sa illegal nga drugas.

Si Sotto mipadayag nga mas maayong usbon ang pamaagi sa pagdungog sa mga kaso labot sa illegal drugs ug himuong susama sa Sandigan Bayan nga adunay tulo ka mga huwes nga mohusay niini. Sa maong paagi mas layo sa kurapsyon ang usa ka huwes.

Buot usab niyang ang makombikto dili na makaapelar ngadto sa Court of Appeals kundili ngadto na diretso sa Korte Suprema alang sa pinal nga desisyon.

Ang maong lakang sa bag-ong sistema sa pagdungog sa mga kaso sa illegal nga drugas iya nang gipahibalo ang mga sakop sa DDB ug suportado kini sa maong ahensya ug kini mamahimo lamang nga malampuson kung magkahimamat sa Chief Justice sa labaw’ng hukmanan.   (BANATNEWS)