CEBU, Philippines - Dugay na natong gisaulog ang Sinulog. Apan gamay ra ang nahibalong ang orihinal nga Sinulog gibase gyud sa relihiyosong tradisyon dinhi sa Sugbu, karon gawas sa relihiyosong kalihukan naa na say Sinulog Grand Mardi Gras.
Base sa nakuhang kopya sa ‘program’ sa Sinulog sa Sugbo 80 gikan kang kanhi Cebu Customs Collector ug gitawag nga “Amahan sa Sinulog” David Odilao, ang unang mga partisipante sa unang Sinulog gilangkuban sa mga dagkong tunghaan dinhi sa dakbayan nga nagdala sa mga “Balangay.”
Kini mao ang Cebu Central Colleges nga karon mao na ang University of Cebu nga nagdala sa pangalang “Kalubihan,” ang Cebu Institute of Technology mao ang “Habagatan,” ang Cebu School of Arts and Trades (CSAT) nga karon Cebu Technological University maoy gitawag nga “Pagatpatan,” ang Colegio de San Jose Recoletos (CSJ-R) nga karon mao na ang University of San Jose Recoletos maoy nagdala sa balangay nga “Dunggoan.”
Samtang ang balangay “Kasapaan” gidala sa Southwestern University (SWU); ang University of San Carlos maoy nagdala sa balangay nga “Kamagayan,” samtang ang University of Southern Philippines maoy nagdala sa balangay “Parian” ug ang University of the Visayas maoy nagdala sa balangay “Pili-Kanipaan” nga gipangulohan ni Donya Josefina “Pining” R. Gullas.
Ang labing unang Sinulog gimugna sa kanhi Ministry of Youth and Sports Development (MYSD) pinangulohan kaniadto ni David “Kuya Boy” Odilao ug sa Augustinian Community Corfrada del Santo Niño de Cebu; kagamhanang lokal sa dakbayan sa Sugbu panahon ni Mayor Florentino Solon, Association of Regional Executives of National Agencies sa rehiyon -7 ug Rotary Club sa Talisay.
Niadtong panahona si Eduardo R. Gullas maoy gobernador sa lalawigan kinsa namulong sa iyang mensahe kaniadto nga “It is my hope that the Sinulog Sa Sugbu will be viewed by the public as part of the current cultural revival program of the government and as a tribute to our beloved Santo Niño.” Si Gullas mao karon ang kongresista sa Unang Distrito sa Sugbu.
Ang Pilipinas maoy giisip nga tinubdan sa Kristiyanismo dinhi sa Asya, ug kini nasentro dinhi sa Sugbu nga gipanguluhan kaniadto ni Haring Humabon ug Rayna Juana nga gibunyagan ni Ferdinand Magellan.
Tumong sa pagpasiugda sa Sinulog sa Sugbo kaniadto mao ang pag-awhag sa mga relihiyosong Sugbuanon aron mas mapalig-on pa ang relasyon sa mga Sugbuanon ngadto sa Magbubuhat.
Ang simbolo sa pag-deboto mao ang Imahen ni Senyor Santo Niño nga gihatag mismo ni Rev. Padre Pedro Valderama kang Rayna Juana atol sa pagbunyag kaniya niadtong Abril 15, 1521.
Paglabay sa 45 ka tuig, Abril 26,1565, giharian na ni Rajah Tupas ang Sugbu. Miabot sa maong adlaw si Miguel Lopez de Legaspi dinhi sa Sugbu. Subling nakaplagan ang imahen nga nakaingon sa dakong kalipay sa mga Sugbuanon pinaagi sa pagsayaw ug pag-indak dungan sa pagdukdok sa tambol nga maoy nahimong sinugdanan sa “Sinulog.”. (BANATNEWS)