Halad 2010 nagsugwak

CEBU, Philippines - Napuno ang Grand Ballroom sa Waterfront Hotel sa siyudad sa Sugbo atol sa gipahigayong Halad sa mga Kanta ug Kinaiyang Sugboanon 2010 niadtong Miyerkules.

Ang kalihukan nga gipasiugdahan ni Dr. Jose “Dodong” Gullas nahimong mabulukon sa mga mitambong sa dihang ilang nadunggan ang mga kantang Sugboanon nga gikanta sa tulo ka mga sikat nga mga artista nga mga Sugboanon nga silang Pilita Corrales, Dulce ug Raki Vega.

Ang partisipasyon sa UV Chorale nga gidumala sa kapikas ni Gullas nga si Madam Nena Gullas nakadungag sa atraksiyon pagkanta sa pipila ka mga Sinugboanong kanta.

Atol sa Halad 2010, gipasidunggan ni Gullas ang mga inilang kompositor ug mag-aawit nga nakatampo sa mga musikang Sugboanon nga malisod na madunggan niining panahona.

Ang gipasidunggan sa Halad 2010 mao sila si Rev. Fr. Ponce Jed Bellones, Inocencio “Siux” Cabase, Maestro Mil Villareal, Inastacio “Stacs” Huguete, Manuel “Maning” Tan Villareal, Manuel Cabase, Metring Ylaya ug Oscar Pagas, ang buta nga nag-awit sa komposisyon ni Fr. Bellones nga “Walay Sama Ang Gugma Sa Dios.”

Nahimong emosyonal ang mga nanambong sa dihang ang mga kabanay sa mga gipasidunggan personal nga nagpasalamat nga giila ang mga natampo sa miyembro sa ilang pamilya sa natad sa musika; misamot kini sa dihang si Dulce nakahilak nga nakigkanta sa iyang inahan nga didto sa maong pasundayag.

Si Gullas atol sa iyang pagpamulong nagkanayon nga ang iyang damgo nga madunggan ug mahibaw-an sa mga bag-ong tubo karon ang mga kanta ug kinaiyang Sugboanon nga wala na kantaha ug hisayri karon maoy nagtukmod kaniya pagpasiugda og susamang pasundayag.

Matud ni Gullas nga kun walay mosugod pagpaila sa mga kantang Sugboanon, mangahanaw lamang kini sama sa damgo. Atol sa iyang pamulong, ang tigpasiugda nagkanayon nga angay pasalamatan ang Ginoo nga nahinayon ang Halad 2010.

Si Madam Nena Gullas nga nahinabi sa Banat News human sa pasundayag nahingangha siya sa pagkapuno sa Grand Ballroom sa hotel. Tungod niini, nagtuo ang magtiayong Gullas nga mahibalik sa mga Sugboanon ang paghigugma sa mga kantang Sugboanon.

Sila si Teotimo “Boytit” Manigos ug Ruperto “Tata” Ylaya, pipila sa mga mahigugmaon sa musikang Sugboanon nga mitambong sa kalihukan nagkanayon sa dihang nahinabi sa Banat News nga gawas nga nalingaw sila sa gipakitang kakilas nilang Pilita, Dulce, Raki ug UV Chorale ibabaw sa entablado, natandog usab sila sa gihimo sa magtiayong Gullas pagpasiugda og kalihukan nga mahinumdoman sa mga Sugboanon ang mga kanta nga karon wala na kantaha.

Didto sa pasundayag ang mga iladong tawo nga sama nila ni Bishop Julito Cortes, Msgr. Achilles Dakay, Fr. Titing Ancajas, Paz Wong ug ang mga anak ni Gullas nga sila si Jiji, Jackie, Joie ug Johnvic, ug anak ni Kongresista Eduardo Gullas nga si Didi. (BANATNEWS)