9 balay naugdaw sa Barangay Luz

CEBU, Philippines - Dul-an sa usa ka milyon ka pesos ang danyos sa sunog nga milamoy sa siyam ka mga panimalay nga miigo ala-1:25 kagahapon sa sitio Regla ug sitio Sto. Niño 3 sa barangay Luz ning dakbayan sa Sugbu.

Si SFO3 Alicasem Espinola, usa sa mga imbestigador sa Cebu City Fire Department nagkanayon nga giisa ngadto sa 3rd alarm ang maong sunog.

Giingong nagsugod sa panimalay ni Ellen Bontilao ang kalayo base sa pamahayag sa mga silingan ug dali kaayo kining mikatap sa mga silingang balay nga ginama usab sa mixed materials. Si Rebecca Bontilao kansang balay naugdaw sa report sa DySS nagkanayon nga didto siya sa laing panimalay ug nakurat nalang siyang mikatap na ang kalayo ug wala na siya'y napunit nga mga butang.

Ang barangay tanod nga si Rommel Abangan mibutyag nga sa ilang pag-responde sa panimalay nilang Alvin Bontuyan duna sila'y nadungog nga buto-buto. Ang kabomberuhan nagtuong posibleng linya sa kuryente o kaha dunay wala mapawong mga mga ekipo sa panimalay nga miinit ang mimugna sa kalayo.

Usa ka Anti-Crime Volunteer sa barangay nga si Junjun Camiguin gikatahong nasamad ang walang tiil niini.

Samtang ang mga panimalay nga naugdaw gipang-iya nila ni Alvin Bontilao, Alberto Payusan, Rebecca Bontilao, Joling Montecino, Zenaida Arpon, Doming Toquero, Helen Egni, kanhi kapitan Nemecio Pagador ug partially burned ang atop sa panimalay ni Kagawad Jerome Pagador. Samtang walo usab ka panimalay ug usa ka bakery ang naugdaw niadtong milabay'ng gabii sa barangay Talisay lungsod sa Santa Fe Isla sa Bantayan lalawigan sa Sugbu.

Si PO3 Leopoldo Villacarias mibutyag nga mokabat P100 mil  ang danyos nga namugna sa maong sunog nga nakontrolar lang sulod sa 30 minutos.

Matud pa ni PO3 Villacarlos nga nagsugod ang kalayo sa panimalay ni Nacoy Almosera human matud pa dunay appliances sa ilang kwarto nga wala mapalong samtang didto sila sa gawas sa ilang balay.

Gikatahong nabati sa pamilyang Almosera ang kusog nga buto sulod sa lawak ug kalit nga miulbo ang sunog. – BANAT NEWS