Bag-Ong piyansa gipatay

CEBU, Philippines - Patay ang usa ka 30-anyos nga lalaki kinsa giingong mao pay pagpiyansa sa iyang kaso kabahin sa illegal nga drugas samtang naangol ang taxi driver nga iyang gisakyan kagahapon sa hapon dihang gipaulanan og bala sa wala mailhing duha ka lalaking nagsakay og motorsiklo kagahapon sa hapon diha sa dalan Osmeña Blvd.

Ang biktima nga gibana-banang nagpangidaron og 30 anyos nga dunay daghang patik sa kalawasan ug nagsul-ob og sleeveless nga itom nakaangkon og upat ka samad pinusilan sa iyang dughan nga nakaingon sa iyang kamatayon.

Samtang ang napagang drayber mao si Joan Miranda, 24, taga Lower Sampaguita, Banilad, Mandaue City, nakaangkon og samad pinusilan sa tuong siko ug tuong dapidapi.

Sumala pa sa imbestigasyon ni PO2 Jodan Batucan sa Homicide Section, mitug-an sa Banat News nga matud pa sa drayber nga misakay ang namatay ug usa ka mahuyang ug babaye diha sa Capitol Site.

Si Miranda mitug-an nga ang namatay diha milingkod sa front seat, ug samtang nagdagan padulong sa downtown area iyang nadunggan nga naghisgot ang iyang mga pasahero nga gikan sila nagpiyansa.

Apan pag-abot diha sa nahisgutang dapit kalit lang silang gipamusil sa mitapad nga motorsiklo. Si Miranda igo nalang mihupo samtang ang iyang mga pasahero sa luyo naglumba og gawas padulong sa Pasil.

Usa ka sakop sa Barangay Intelligence Network ang giingong misakay ug maoy mihatud kanila sa Cebu City Medical Center apan gideklarar nga dead on arrival ang iyang pasahero.

Sa report sa DyAB kagahapon, usa ka mahuyang nga nangangkong kauban sa biktima miila sa naulahi nga mao si Raul Dadang, taga Osamiz City.

Matud pa sa mahuyang na-detained si Dadang diha sa Cebu City Police Office (CCPO) ug gikan sila sa Korte diha sa Kapitolyo kay mipiyansa.

Kuyog nila niadtong tungura ang uyab ni Dadang nga mabdos ug padulong unta sila sa pension house nga gipuy-an sa namatay diha sa dalan Manalili apan kalit silang gibanhigan pag-abot sa maong dapit.

Nakuha diha sa crime scene ang walo ka kabhang sa bala sa kalibre .45 nga pistola. Samtang gisusi pa karon sa kapolisan kun ang namatay mao ba gyud si Dadang.

Mao na kini ang ikaduhang biktima sa pagpamusil ning semanahuna nga ang dinakpan sa CCPO nga nakagawas napusilan patay.

Niadtong milabay'ng Lunes usa ka Richard Mañala, 40,  nga taga Isabela City, Basilan nga gipasanginlang mangunguot ug bag-uhay lang gibuhian sa kapolisan ang gipusil patay sa mga nagmotorsiklong lalaki. – BANAT NEWS