Tining mahimo nang molingkod

CEBU, Philippines - Ang regional director sa Commission on Election Atty. Rene Rey Buac mibutyag nga mahimong makalingkod na si kanhi Bogo mayor Celestino ‘Tining’ Martinez sa pagkakongresista sa kwatro distrito bisan pa man og may idusong motion for reconsideration si Kongresista Benhur Salimbangon ngado sa Korte Suprema.

Kini tungod kay ang desisyon sa Korte Suprema nagkanayon man nga “immediately executory” kini. “Pwedeng makaduso og motion for reconsideration si Salimbangon ngadto sa Korte Suprema pero makalingkod na si Martinez immediately, executory man ang desisyon sa Supreme Court,” matud pang Buac sa interbyu sa DyRF.

Si Buac miingon usab nga ang ilang buhatan moproklamar lang kang Martinez nga mananaog sa pagka-kongresista sa 4th district kun may kamanduan na silang madawat sa Korte Suprema pinaagi sa Comelec Manila. Apan iyang giklaro nga ang Department of Interior on Local Government kon DILG mao ang mag-instalar ug magpalingkod kang Martinez.

Migawas si Martinez nga milabaw og 4,948 ka botos batok kang Salimbangon gikan sa mga botos nga gideklarar nga ‘stray ballots’ tungod kay ang nakasuwat “C. Martinez” ug kini giapil og ihap pabor kang Martinez.

Samtang ang DILG-7 legal officer, Atty. Danilo Almendras nagkanayon nga andam silang mopalingkod kang Martinez kun may kamanduan silang madawat sa Korte Suprema pinaagi sa buhatan ni Interior Secretary Reynaldo Puno.

Sa iyang bahin, si Tining Martines nagkanayon nga ila nang gitun-an ang desisyon kay gitinguha na niyang makalingkod sa pagkongresista sanglit lima na lamang ka bulan ang nahibilin sa iyang termino aron usab mahatagan og hustisya ang iyang mga supporters.

Samtang si 3rd district congressman Pablo John Garcia nagkanayon dili angayang mabalaka si Salimbangon kay dili pa final and executory ang desisyon sa Korte Suprema.

Gipasabut ni PJ Garcia nga sigon sa balaod ang desisyon sa Korte Suprema dili mahimong final and executory kun may madusong motion for reconsideration sulod sa 15 ka adlaw human gipakanaog ang desisyon. Si Liberal Party gobernatorial candidate Hilario ‘Junjun’ Davide III miangkong makatabang og daku sa ilang kandidatura ilabi na sa maong distrito ang maong kalamboan.

Samtang si Salimbangon mipadayag atol sa interview sa DyDD nga taas pa kaayo ang maong proseso tungod kay ang giresulbar sa Korte Suprema mao palang ang pag-apil og ihap sa 5 mil ka mga nabasurang botos ni Edilito Martinez nga na-disqualify ug gitipon sa botos ni Martinez.

Gi-insister ni Salimbangon nga molabaw gihapon siya ug siya ang midaog bisan pa og i-apil og ihap ang mga stray votes ni Edilito Martinez basta dili lang basehan ang mga gihulagway niyang ‘tampered’ nga mga balota gikan sa Bogo.

Matud ni Salimbangon nga gi-andam na karun sa iyang mga abogado ang pagduso og motion for reconsideration batok sa maong gipakanaug nga desisyon sa Korte Suprema.

Si Salimbangon nangusog nga mapailawom sa Comelec Control ang dakbayan sa Bogo kundili man ang 4th District tungod sa giingong mga goons sa mga Martinez, ang mga Martinez daan nang mihimakak kabahin sa mga goons. Ang Bogo maoy usa sa gibutang nga ‘areas of concern’ sa Comelec ug PNP. – BANAT NEWS