CEBU, Philippines - Dili na mahimong iuli ang bayad sa mga nanag-iya og sakyanan nga nakabayad na sa pagpataod sa Radio Frequency Identification (RFID) dinhi sa Central Visayas lakip na ang dinhi sa Sugbu bisan pa man mipagawas og kamanduan ang Korte Suprema nga nagpugong sa pagpatuman sa RFID ngadto sa mga tag-iya nga mi-renew na sa rehistrasyon sa ilang mga sakyanan.
Kini maoy gipahibawo ni Assistant Regional director Ed Catarungan sa LTO-7 sa dihang nahinabi sa Banat News kagahapon human kini nakadawat og tawag gikan sa ilang labaw nga si Arturo Lomibao nga nagmando nga ihunong una ang pagpatuman sa RFID sa mga sakyanan tungod sa kamanduan sa Korte Suprema.
Ang tanang buhatan sa Land Transportation Office dinhi sa Central Visayas gimandoan sa paghunong sa pagdawat sa RFID tungod sa Motion for Reconsideration nga giduso sa Department of Transportation and Communication (DOTC).
Matud ni Catarungan nga niadto pang bulan sa Nobiyembre nagsugod sila sa pagpatuman sa RFID ug gani daghan nang mga sakyanan ang nataoran niini ug kini nagkantidad og P350.
Apan giklaro ni Catarungan nga dili na gyud nila mauli ang gibayad sa mga tag-iya og sakyanan sanglit wala moingon kaniya si Lomibao nga iuli ang nabayad nga kwarta niadtong nakapataod na og RFID.
Ang LTO gihatagan og napulo ka adlaw sa Supreme Court pagtubag sa ila usab nga motion for reconsideration apan matud ni Catarungan nga wala pa sila makadawat og kopya sa maong desisyon sa Korte Suprema hinungdan nga wala una sila karun motubag niini.
Sa pagkakaron ang LTO nakarehistro na og ubay-ubay nga mga sakyanan nga nakapataod og RFID apan wala pay motorsiklo nga nakapataod sanglit karun pang bulan sa Marso kini sugdan.
Iyang giklaro nga ang mga motorsiklo kinahanglan nga ang mga tag-iya niini moagi pa una sa Motor Vehicle Inspection Service (MVIS) diha sa ilang buhatan sanglit mao kini ang mosusi sa motorsiklo nga luwas pabang sakyan sa tag-iya.
Sa nasayran niadtong miaging adlaw gipugngan ang LTO alang sa pagpatuman sa RFID human usab miduso og petisyon ang transport groups ngadto sa Korte Suprema nga pugngan ang pagpatuman sa RFID sa rason nga pakyas ang LTO pagpatuman og public hearing. – BANAT NEWS