Wanted nga kriminal nakapusil

CEBU, Philippines -  Usa ka lalaki nga wanted sa kasong attempted murder nadakpan human makapusil sa tawo nga misuway og badlong sa iyang grupo tungod kay namuak kini og mga botelya didto sa barangay Maya, lungsod sa Daanbantayan sa miaging kaadlawon.

Si SPO3 Cesar Alburo nga nahinabi sa Banat News miila sa biktima nga si Benjamin Gelig, hingkod, nga taga sitio Purgason, barangay Maya, sa maong lungsod, samtang ang nakapusil kaniya mao si Gerald Orongan, taga sitio Jubot, barangay Talisay sa mao gihapong lungsod.

Sumala pa ni SPO3 Alburo nga ang biktima misuway og badlong sa kauban sa suspetsado kay gipamuak niini ang mga basiyo sa mga ilimnon sa tindahan nga ilang giinoman .

Unya daling mibunot ang suspetsado sa iyang .38 kalibre nga revolver ug dayong pusil ngadto sa biktima kansang bala miigo sa siko niini ug milapos ngadto sa iyang tiyan.

Apan matud pa nailog pa sa biktima ang armas sa suspetsado ug nakahigayon ang mga kauban sa biktima sa pagpanigbas, ug pagkulata sa nahauna.

Ang biktima daling gihatod sa iyang mga kauban ngadto sa tambalanan, samtang ang miresponding kapolisan nakurat dihang maoy naabtan nila sa dapit nga nahitaboan ang suspetsado nga gigapos na og pisi kansang kalawasan naputos sa mga bun-og.

Kasong paglapas sa Comelec Gun Ban ug Frustrated Murder ang ipasaka sa kapolisan batok sa suspetsado. - Bryner L. Diaz (BANAT NEWS)