Lolo miluba sa nanulong kaniya

CEBU, Philippines - Agi og depensa sa kaugalingon, nadunggaban sa usa ka lolo ang usa ka lalaki nga misulong kaniya ug nanghagit og away didto sa sitio Colonia, barangay Ilihan, lungsod sa Tabogon sa miaging adlaw. 

Base sa taho nga nahidangat sa Operations Branch sa Cebu Provincial Police Office (CPPO) nasayran nga ang suspetsado giila nga si Leonardo Romo Sr. 65, minyo, nga taga Colonia, samtang ang nadunggaban mao si Marcos Himal, 43, nga iyang silingan.

Ang pasiunang imbistigasyon nagbutyag nga ang biktima misulong sa balay ni Romo ug giingong nanghagad kini og away ug nagdala og sundang ug tubo.

Daling miduol ang biktima sa suspetsado unya nagnilayogay sila hangtod nga nakahigayon si Romo sa pag-ilog sa hinagiban sa biktima ug gisumbalik kini sa pagluba duha ka higayon ngadto sa naulahi.

Ang biktima nakaangkon og duha ka samad dinunggaban sa nagkalainlaing bahin sa iyang lawas ug dali kining gihatod   ngadto sa wala pa matinong tambalanan.

Samtang mitahan usab dayon sa iyang kaugalingon ang suspetsado ngadto sa kapolisan ug kasamtangang giandam na ang kaso nga ipasaka sa kapolisan batok kaniya. - Bryner L. Diaz (BANAT NEWS)