Ualat hulipan, Lito R. nangusog?

CEBU, Philippines - Si Mandaue City Mayor Jonas Cortes ug abogado niining si Atty. Francisco Amit mitumbok ni DILG Under Secretary Lito Ruiz nga maoy nangusog nga mahulipan si Mandaue City Police Office Director Sr. Supt. Orlando Ualat sa iyang katungdanan.

Atol sa press conference kagahapon sa buntag si Amit mipadayag nga sa milabay'ng semana pa sila nahibalo nga hulipan si Ualat pagka director sa kapolisan sa Mandaue.

Matud pa ni Amit gipahibalo nang daan ang mayor sa maong kalambuan ug gani nasayod nang daan si Cortes ug wala kini supak nga si Sr. Supt. Noel Gillamac maoy ihulip ni Ualat.

Gikatahong nasayod sila si Cortes ug Amit nga may kalambigitan si Usec. Ruiz nga maoy nangusog ngadto sa mga kadagkoan sa PNP sa dinaliang pagpahulip kang Ualat human sa kontrobersiyal nga proyekto sa dalan sa RT Colina St. sa barangay Ibabao-Estancia dakbayan sa Mandaue nga gikabangian nila ni Mayor Cortes ug Cebu 6th District Kongresista Nerissa Soon-Ruiz nga asawa ni Usec. Ruiz. Apan si Usec. Ruiz sa pakighinabi sa Banat News sa telepono mihimakak sa mga alegasyon nila ni Cortes ug Amit ug mipasabot nga wala siya manghilabot sa mga kalihukan sa dakbayan sa Mandaue bisan pa kung ang iyang asawa ang nalambigit niini.

Matud pa ni Ruiz busy usab siya sa iyang mga kalihukan sa dakbayan sa Lapulapu nunot sa iyang pagpapili pagka-kongresista sa “lone district” sa Lapulapu ug wala na siya’y higayon nga makigtagbo sa mga opisyal sa kapolisan.

Kahinumduman nga si Ualat maoy nagpadala og Special Weapons and Tactics nga i-kordon ang gitrabahong rehabilitasyon sa dalan RT Colina sa mga sakop sa Department of Public Works and Highways hinungdan nga nahunong ang trabaho.

Kini giingong subay sa kamandoan ni Cortes. Nasuta nga ang dakbayan duna say kaugalingong plano sa maong dalan hinungdan nga naabot ang isyu sa Ombudsman for the Visayas ug ang duha nagkasabot nga magtinabangay nalang sa rehabilitasyon sa maong dalan. BANATNEWS)