Cebu city labing daghan og sunog
CEBU, Philippines - Ang dakbayan sa Sugbu maoy dunay labing daghang insidente sa sunog ug maoy dunay labing dakong danyos sa maong kalamidad sa usa lang ka insidente sa milabay'ng tuig sumala pa sa report sa Bureau of Fire Protection regional headquarters.
Kini mao ang nahitabong sunog niadtong bulan sa Oktobre diha sa barangay Tejero nga sanglit miabot og kapin P23 milyones ang danyos niini.
Si SFO1 Alicasim Espinola, ang imbestigador sa Cebu City Fire Department nagkanayon nga niadtong 2009 miabot og 132 ka alarma sa sunog ang ilang gitubag kun itandi sa tuig 2008 nga 102 ka fire alarms.
Subay sa statistics nga gipagawas sa BFP-7 sa comparative statistics sa 2008 ang Cebu Province mitala og 238 ka fire incidents samtang siyam ang namatay, 47 ang naangol, ug gibanabanang P52,768,505 ang danyos apan pagka-2009 mas midaghan kini ug mitala og 329 ka insidente, 9 ang patay, 20 ang naangol ug dunay danyos nga P96,125, 420.00.
Sa lalawigan sa Bohol 61 ka insidente ang sunog, ug upat ang naangol ug may kinatibuk-ang danyos nga P10,137,200 mas ubos hinuon ang sa tuig 2009 tungod kay 60 lang ka sunog ang natala, duha lamang ang naangol ug P15,727,925.00 ang danyos. Sa Negros Oriental, mitala og 122 ka sunog, pito ang patay, 32 ang angol ug may danyos nga P16,507,830 sa 2008, samtang sa milabay'ng tuig mius-os kini ngadto sa 85 ka insidente, tulo ang patay ug danyos nga P13,187,673.
Ang lalawigan sa Siquijor mitala lang og upat ka sunog ug danyos nga P1,072,000 sa 2008, misaka og gamay pagka-2009 diin miabot og 12 insidente sa sunog ug danyos nga P2,792,000.
Pabiling gihandom sa kabumberuhan nga makabaton og helicopter nga magamit sa mga dagkong sunog ilabi na niadtong mga tag-as nga buildings nga di maabot sa ilang fire ladder karon. BANATNEWS)
- Latest
- Trending
