CEBU, Philippines - Nasikop sa aktong paghupot og armas nga walay lisensya ang usa ka empleyado sa Mactan Economic Processing Zone human kini ireklamo gumikan sa pagpabuto og armas diha sa sitio Commonwealth, sa barangay Ibo dakbayan sa Lapulapu kagahapon sa kaadlawon.
Mag-atubang karon og kasong kalapasan sa Comelec gun ban ang suspek nga si Juanito Geonson, 31, residente sa maong dapit ug hayan dili makapiyansa hangtud nga di matapos ang piniliay.
Base sa imbestigasyon ni PO3 Roger Oriarte sa kapolisan sa Station 5 nasayran nga usa ka tawag ang ilang nadawat kabahin sa usa ka tawong nagpabuto og armas diha sa maong dapit.
Pag-abot sa mga sakop sa Police Station 5 naaktuhan si Geonson nga naghupot sa usa ka armas nga kalibre .357 hinungdan nga ila kining gidis-armahan ug nasutang may unom ka buhing bala sa iyang posesyon.
Naglibog usab ang kapolisan gumikan sa maong dapit ang ilang nakitang basiyo sa bala usa ka kalibre .45 apan ang nakuhang armas gikan sa suspetsado usa ka kalibre .357.
Si Geonson napakyas og pagpakitag dokumento nga nag-exempt kaniya sa pagdala sa maong armas samtang gipatuman na ang Comelec gun ban sugod niadtong adlaw'ng Domingo. BANATNEWS)