Mga botika sa Mandaue wala mapitol

CEBU, Philippines - Ang kagamhanan sa dakbayan sa Mandaue napakyas pagpitol sa mga botika nga dili mohatag og diskuwentong 20 porsiyento sa mga tambal nga paliton sa mga senior citrizen (SC) ug sa mga may apan sa panglawas.

Mao kini gibutyag ni Benjamin Gahi, ang presidente sa pederasyon sa SC sa pakighinabi sa Banat News, kinsa nagkanayon nga puwerting gahia motuman sa balaod sa mga tindahan og tambal diha sa Mandaue.

Gibasol ni Gahi ang kagamhanan sa maong dakbayan tungod kay matud pa niya napakyas kini sa pagpatumang higpit sa balaod nga naghatag og pabor sa mga SC ug sa mga may deperensya sa panglawas.

Miingon si Gahi nga puwerting tamboka sa balaod nga naghatag og kaayohan sa mga edaran ug sa mga disabled, apan daot ug wala'y umoy ang mga opisyal sa gobyerno sa maong dakbayan sa pagpatuman sa balaod.

Midugang si Gahi nga ang kakuwang sa ngipon sa mga lider sa maong dakbayan maoy nagnudnod sa kaalautan sa mga edaran ug sa mga inutil nga mga molupyo sa maong lugar.

Hinungdan nga ang mga tindera sa botika molurat lang ang mata kun mangayo na og 20 porsiyentong diskuwento ang mga tiguwang, matud pa sa mga tigpaniid. Nagtuo si Gahi nga mohumok ra ang mga opisyal sa maong dakbayan sa pagpatuman sa balaod kun ikasumbong na sa mga SC ug may apan sa panglawas ang ilang suliran ngadto kang Senador Pia Cayetano inig bisita niini nganhi sa Sugbo.

Kini tungod kay mas ganahan ang mga tiguwang ug ang mga disabled nga adto nalang mangayo kang Cayetano og baratong tambal kay sa mga opisyal sa Mandaue, sumala pa sa ubang mga SC. – BANAT NEWS