Construction worker giluba angol

CEBU, Philippines - Nalandig sa tambalanan ang usa ka construction worker human kini dunggaba sa tulo ka wala hiilhing lalaki didto sa sitio Lahing-Lahing, barangay Mabolo, ning dakbayan sa Sugbo sa miaging gabii.

Ang biktima mao si Lodino Aleman Tagalog, 26, usa ka stay-in worker sa Dakay Construction nga nadestino sa Persimmen Mabolo, ug lumad nga taga Media Onse sa dakbayan sa Toledo.

Nasayran nga ang biktima uban sa iyang igsoon nga si Odchigue nagkalingaw og inom sulod sa usa ka videokihan sa nahisgutang lugar dihang sa ilang paggawas giduol sila sa mga lalaki ug gipangulata.

Unya samtang nagkagubot, usa sa mga lalaki maoy miduslak og ice pick sa tuong bahin sa lawas sa biktima.

Human sa maong hitabo, ang maong mga lalaki mikabad og panagan pahilayo sa maong dapit, samtang ang biktima miuli pa sa ilang bunkhouse kay nagpahatod sa iyang kauban nga si Judy Henson ngadto sa Cebu City Medical Center.

Gisuta pa sa kapolisan ang nagpaluyong hinungdan sa pagpangulata ug panunggab ngadto sa biktima. – BANAT NEWS