CEBU, Philippines - Gihangop ni Lapulapu City Police Chief Senior Superintendent Mariano Natuel Jr. ang pagsalmot sa National Bureau of Investigation (NBI) sa pag-imbistigar sa kasong pagpamanhig patay sa body guard ug pagkaangol sa agalon niining babaye nga pinanser sa Casino Mactan.
Si Natuel nga nahinabi sa Banat News miingon nga makaayo alang kanilang mga polis ang pag-apil sa uban pang ahensiya sa kagamhanan sa paghatag og dinaliang kasulbaran sa maong kaso ug hustisya nga gipangita sa mga biktima.
Ang pamilya sa gipatay nga si Allan Berame maoy mihangyo sa mga otoridad sa NBI nga motabang sa pag-imbistigar sa maong kaso.
Samtang si Natuel usab miingon nga gipaningkamutan karon sa ilang buhatan nga masulbad dayon ang kamatayon ni Berame ug ang pagka-angol sa iyang amo nga si Marites Amit kinsa gibanhigan sa wala hiilhing mga kriminal niadtong Disyembre 30, 2009 didto sa dalan M. L. Quezon Avenue, sa barangay Pajo, dakbayan sa Lapulapu.
Matud pa ni Natuel nga nasentro karon ang ilang imbestigasyon sa love triangle base usab sa mga kasayoran nga ilang nahipos nga matud pa nalambigit usab og laing babaye ang namatay.
Dugang pa ni Natuel nga ilang gisalikway ang uban pang mga anggulo nga naglakip sa politika tungod kay ang namatay pulos man suod nga higala sa kampo ni Chan ug ni Radaza.
Si Konsehal Jonard Ahong Chan nga magpapili sa pagka- mayor sa dakbayan para sa election karong Mayo, gibati og katahap nga politika ang nagpaluyo sa kamatayon ni Berame.
Matud pa niya nga sa wala pa mahitabo ang pagpatay kang Berame daan na kining nagpahibalo kaniya nga may planong dautan kaniya (Chan) ang iyang mga kaatbang sa politika.
Hinuon hugtanon usab kining gipanghimakak sa kampo ni Mayor Arturo Radaza. – BANAT NEWS