Entry sa Sinulog karon na kutob

CEBU, Philippines - Karon nang adlawa ang gikatakda nga deadline alang sa pagpanawat og mga entries alang niadtong mosalmot sa Sinulog 2010 grand parade karong Domingo.

Kini maoy gibutyag sa executive director sa Sinulog Foundation nga si Ricky Ballesteros, samtang padayon usab ang ilang gihimo nga pagpangandam.

Gipadayag hinuon ni Ballesteros nga andam silang mo-accommodate niadtong maawahing magparehisto apan kini kutob ra karong Miyerkules.

Sa kasamtangan, pipila pa lang ka mga contingents ang opisyal nga nalista nga mosalmot sa Sinulog grand parade karong Domingo.

Lakip sa unang nagpalista sa Sinulog Based category mao ang Tangub City, Basak Pardo, ingon man ang AMA Computer College.

Samtang ang mga contingents alang sa Free Interpretation Category nga unang nagparehistro mao ang Placer sa Masbate, San Carlos City, Lanao del Norte, ug uban pa.

Wala pa hinuoy labot niini ang mga midaog sa Sinulog sa Kabataan sa Lalawigan ug sa Dakbayan nga awtomatikong makasalmot sa grand parade.

Giawhag na ni Ballesteros nga magpalista karong adlawa ang ubang mga out-of-town contingents nga una nang mipadayag pagsalmot sa festival.

Kini aron ila nang mahan-ay og sayo ang plastada sa mga contingents nga mosalmot sa ika-30 nga pagpahigayon sa Sinulog sa Sugbu.

Sa kasamtangan 90 porsiyento nang nahuman ang ilang gihimo nga pagpangandam alang sa mas grandiyosong festival.

Gani miingon si Ballesteros nga ang ilang gitutukan karon mao na lang ang rehearsal alang sa grand finale nga langkuban sa 500 ka mga performers.

Lakip unya nga mo-perform sa grand finale mao ang mga Cebuano international singers nga sila si Dulce, Pilita Corales ug Dandin Ranillo.

Nasayran usab nga lakip sa giimbitar nga mo-perform sa grand finale mao ang Filipino boxing icon nga si Manny “Pacman” Pacquiao. – BANAT NEWS