Zubiri di susihon - Comelec

CEBU, Philippines - Ang Provincial Comelec Office dili na mopahigayon og pakisusi sa gihimong pag-endorsar kang Senador Miguel Zubiri sa pipila ka lokal nga kandidato sa 3rd district dinhi sa lalawigan sa Sugbu.

 Kini aron pagsuta kun wala bay tulubagon si Zubiri kinsa mi-endorsar usab ug nangampanya sa mga kandidato sa siyudad sa Toledo ug sa probinsiya sa Sugbu nga mga miyembro sa One Cebu Party niadtong adlaw nga Miyerkules atol sa golden charter anniversary sa pagkasiyudad sa Toledo.

Ang buhatan ni Provincial Election Supervisor Atty. Lionel Marco Castillano mitumbok nga kawang lamang ang ilang pakisusi kay dili pa mosalir ang kasong premature campaigning tungod kay ang gi-endorsar niini nga lokal nga kandidato dili man officially matawag nga kandidato kay wala pa magsugod ang campaign period.

 Gawas pa niini, ang Provincial Comelec Office dili makadawat og reklamo susama niini tungod kay ang mo-reklamo niini adto man atimanon sa Comelec sa Manila.

 Nasayran nga si Zubiri mitambong sa kasaulogan sa anibersaryo sa Toledo City, mibatbat nga maayo kaayo ang pagdumala sa siyudad nga gipangulohan ni Mayor Arlene Zambo ug pag-abag sa kagamhanan sa probinsiya pinanguluhan ni Gov. Gwendolyn Garcia ug ni Kongresista Pablo John Garcia.

 Kini tungod kay talagsaon ra kaayo ang panaghiusa ug pagtambayayong sa mga lokal nga opisyales alang sa kalambuan sa ilang matag lugar.

 Busa, matud pa ni Zubiri, tataw na lamang kaayo nga angayan nga masublian sa posisyon si Garcia ug ang iyang runningmate nga si Glenn Soco ug ingon man sila si Kongresista Pablo John Garcia sa ikatulong distrito ug mga opisyales sa siyudad sa Toledo.

 Giklaro hinuon daan ni Zubiri nga dili siya mapasakaan og premature campaigning tungod kay dili man siya kandidato.

Pipila na ka semana ang nakalabay, ang Korte Suprema mipagawas og desisyon sa dugay nang kasong may kalambigitan sa premature campaigning nga gipasaka ug kini miluwat og ruling nga wala'y nalapas ang maong kandidato.

Samtang karong poll automation na ang gamiton sa Mayo dunay probisyon niini nga nag-ingong makunsiderar lang nga ‘candidate’ ang usa ka nagplanong mopapili kini kun moabot na ang campaign period, ang campaign period magsugod karon pang Pebrero 9 ug matapos kini human sa 90 ka adlaw. – BANAT NEWS