Drag racing sa south coastal road susihon gyud

CEBU, Philippines - Si Bokal Juan Bolo miawhag sa mga opisyales sa dakbayan sa Talisay nga ipapriso gyud ang mga illegal drag racers nga maglumba sa ilang mga sakyanan sa Cebu South Coastal Road atol sa kagabhion.

 Si Bolo nagkanayon nga bisan pa man og may ordinansa nang napasar ang konseho sa siyudad nga nagdili sa pagpahigayon og mga illegal drag racing sa dakbayan apan may nadawat gihapon siya og report nga may mga batan-on nga maglumbaanay sa ilang mga sakyanan ug magpustaanay.

 Matud pa ni Bolo nga angayang dili molugak ang kapolisan sa paggukod sa nakalapas sa maong ordinansa aron wala'y disgrasyang mahitabo sa Cebu South Coastal Road ug labaw sa tanan dili madisturbo ang pagkatulog sa mga residente sa maong lugar.

 Subay niini, si Bolo nanawagan sa publiko nga mo-report sa kapolisan aron masikop ang mosalmot sa illegal drag racing sa south coastal road.

 Nasayran nga ang Cebu South Coastal Road hugopanan gihapon sa mga batan-on nga drag racers kinsa giingong wala mahadlok sa anti-illegal drag racing ordinance sa siyudad.

 Si Bolo niawhag usab kang Supt. Henry Biñas, ang hepe sa kapolisan sa Talisay City, nga hingusgan ang pagpatuman sa maong ordinansa diin ang masakpang mosalmot sa maong lumba sa sakyanan, apil na ang motorsiklo, sikopon ug prisohon sulod sa dili minus usa ka tuig nga wala'y itugot nga probation ug pagmulta og dili mominus sa P200 mil.

 Dugang pa ni Bolo nga wala siya makontento sa pamahayag ni Biñas, naglisod ang kapolisan sa pagdakop sa mga drag racers kay ang mga nag-roving mga police lamang maoy bantayan niini ilabina sa tungang gabii hangtud sa sayong kaadlawon. – BANAT NEWS