Prosesyon ni Sr. Santo Niño gipalapdan

CEBU, Philippines - Mas gipalapdan ang rota sa tinuig nga prosesyon sa pagsaulog sa Fiesta Señor dinhi sa dakbayan sa Sugbo, moagi ang rota sa prosesyon niini karong Enero 16, 2010 ug gipaabot nga mas daghan pa ang mokuyog niini kun itandi sa milabay'ng tuig.

Ang prosesyon anha manukad sa Basilica Del Santo Niño mogawas kini ngadto sa dalan Magallanes diretso sa dalan A. Borromeo, liko diha dapit sa Gaisano South sa dalan Leon Kilat agi sa GSIS lahos sa Asian College of Technology (ACT).

Gikan sa ACT modiretso kini ngadto sa dalan J. Alcantara tadlas ngadto sa University of San Carlos (USC) Girls High liko paingon ngadto sa dalan V. Rama Avenue ug moliko sa dalan B. Rodriguez lahos sa agi sa Fuente Osmeña ug mosubay sa Osmeña Boulevard dayon lahos na balik sa Basilica.

Ang kapolisan sa dakbayan ingon man sa reservists sa Armed Forces of the Philippines moabag sa mga sakop sa Parish Security Group sa pag-kordon sa mga deboto sa maong prosisyon.

Ang karo sa Sr. Santo Niño butangan og kordon aron mapugngan ang mga tawo nga modugok niini ug aron usab mahapsay ang kalihukan.

Samtang ang kapolisan sa dakbayan sa Talisay ug Mandaue lakip sa gihatagan og tahas pinaagi sa pagkontrolar sa trapiko diha sa Cebu South Coastal Road Project (CSCRP) ug mga dalan gikan sa Mandaue padulong sa dakbayan aron dili maghuot ug dili mabalda ang dagan sa prosesyon. – BANAT NEWS